https://innews.az/uploads/news/2026-09/_innews_9ba9235eddbdff9a52f52059a_o.jpg
Azərbaycan Dövlət Akademik Musiqili Teatrı 117-ci mövsümünə dahi bəstəkar Üzeyir Hacıbəylinin “Arşın mal alan” operettasının nümayişi ilə başlayıb.
Heydər Əliyev Fondunun və Mədəniyyət Nazirliyinin təşkilatçılığı ilə keçirilən Üzeyir Hacıbəyli XVlll Beynəlxalq Musiqi Festivalı çərçivəsində təqdim olunan tamaşa alqışlarla qarşılanıb.
1913-cü ildə yazılan dünyaşöhrətli əsərin süjet xəttinin əsasında Əsgər və Gülçöhrənin səmimi məhəbbət hekayəsi dayansa da, tamaşa ümumilikdə XX əsrin əvvəllərində Azərbaycan cəmiyyətində mövcud olan köhnəlmiş adət-ənənələrə qarşı yeni düşüncənin, azadlıq və sevgi uğrunda mübarizənin bədii ifadəsidir.
Sonuncu quruluşu 2009-cu, bərpası 2016-cı ildə olan bu səhnə əsərinin quruluşçu rejissoru Elvin Mirzəyev, bərpaçı rejissoru Əhəd Hacıyev, quruluşçu dirijoru Əməkdar incəsənət xadimi Nazim Hacıəlibəyov, dirijoru Əməkdar incəsənət xadimi Fəxrəddin Atayev, quruluşçu rəssamı Əməkdar rəssam Nabat Səmədova, quruluşçu baletmeysterləri Əməkdar artistlər Zakir və Yelena Ağayevlər, xormeysteri Əməkdar artist Vaqif Məstanov, geyim üzrə rəssamı sənətşünaslıq üzrə fəlsəfə doktoru Gülnarə Xəlilova, konsertmeysteri Fidan Məmmədova, rejissor assisteni isə Sevinc Məmmədovadır.
Tamaşada rolları Əməkdar artist Əzizağa Əzizov (Soltan bəy), aktyorlar Gülcahan Salamova (Cahan xala), Əmrah Dadaşov (Süleyman bəy), Emin Zeynallı (Əsgər), Aydan Həsənova (Gülçöhrə), Türkel Tariqpeyma (Asya), Ülviyyə Əliyeva (Telli) və Ruslan Mürsəlov (Vəli) oynayıblar.
Qeyd edək ki, festival çərçivəsində 19 və 20 sentyabr tarixlərində teatrın səhnəsində bəstəkarın "Ər və arvad" və "Leyli və Məcnun" tamaşaları da oynanılacaq.
Ən son xəbərləri səhifəmizdən də izləyin
