https://innews.az/uploads/news/2026-09/_innews_817fd2f9e6871bac245371c2d_o.jpg
Bakıda “NEMİ Manor” İncəsənət Mərkəzinin açılış mərasimi keçirilib.
"innews media" xəbər verir ki, açılış mərasimində “NEMİ Manor” İncəsənət Mərkəzinin rəhbəri Təhminə Yusifova qonaqları salamlayaraq “NEMİ Manor”un unikal missiyasından söz açıb. O, mərkəzin şəhərin mədəni həyatına qazandıracağı yenilikləri və gələcək hədəfləri diqqətə çatdıraraq, bu ocağın hər bir sənətsevər üçün ilham mənbəyi olacağını bildirib. Təhminə Yusifova qeyd edib ki, mərkəzdə milli adət-ənənələrimizin estetik ruhunu modern baxışla birləşdirən xüsusi məkanlar yaradılıb. Burada nişan, xına və nikah mərasimlərinin təşkili, tədris fəaliyyəti, sərgi və müxtəlif mədəni tədbirlərin keçirilməsi nəzərdə tutulub.
Gənc sahibkar Neman Abdullayev çıxışında mərkəzin gənclərin intellektual və yaradıcı inkişafına, asudə vaxtlarının səmərəli təşkilinə, yeni bacarıqlar əldə etməsinə əlverişli imkan yaradacağını qeyd edib. O, gəncləri bu istiqamətdə əməkdaşlığa dəvət edib.
Mərkəzdə nümayiş etdirilən, keçmişlə müasirliyi özündə birləşdirən müxtəlif muzey eksponatları da qonaqların böyük marağına səbəb olub.
Mərasimin bədii-musiqili hissəsində “Etnatopiya” ansamblının üzvləri Murad Nəbiyev və Samir Fərəcov, həmçinin tanınmış müğənnilər İlqar Sadıqov və Seymur Əliyev maraqlı ifaları ilə çıxış ediblər. Sənətçilərin təqdim etdiyi zəngin musiqi proqramı tədbir iştirakçıları tərəfindən böyük rəğbət və alqışlarla qarşılanıb.
Bununla da, “NEMİ Manor” İncəsənət Mərkəzi İçərişəhərin tarixi mühitinə yeni bir estetik dəyər qazandıraraq, yaradıcılıq, təhsil və mədəni təşəbbüslər üçün multidissiplinar bir platforma kimi qapılarını sənətsevərlərin üzünə açdı.
Ən son xəbərləri səhifəmizdən də izləyin
