Əlimurad Hacızadə: “Avarçəkmədə özünəinam vacibdir”

Mingəçevir, "innew .media" — Avarçəkmədə uğur qazanmaq üçün özünəinamın vacib amillərdən biri olduğu bildirilir.

"innews media" xəbər verir ki, bunu “Mingəçevir Reqatası-2026” beynəlxalq turnirinin qalibi Əlimurad Hacızadə deyib.

İdmançı yarışa hazırlıq prosesindən və əldə etdiyi nəticədən danışıb:

“Davamlı məşq edirdik. Hava şəraitinin necə olmasına baxmayaraq, öz üzərimizdə çalışırdıq. Nəhayət, çəkdiyim əziyyətin nəticəsini gördüm”.

Hacızadə uğurunun əsas amillərindən birinin özünəinam və məqsədyönlü məşqlər olduğunu vurğulayıb.

“Bu idman növündə özünəinam vacibdir. Qalib olduğuma görə çox sevinirəm. Qarşıdan “Prezident Kuboku” yarışı gəlir. Hazırlaşacağıq və yaxşı nəticə göstərməyə çalışacağıq”, — deyə o bildirib.
İdmançı növbəti yarışla bağlı planlarını da açıqlayıb:

“Gələn il avarçəkmə və kanoe üzrə “Prezident Kuboku” reqatasında iştirak edəcəyəm. İnanıram ki, orada da yaxşı nəticə əldə edərəm”.

Qeyd edək ki, Əlimurad Hacızadə “Mingəçevir Reqatası-2026”nın ikinci günündə 1 nəfərlik qayıqla 1000 metr məsafəyə yarışda birinci yeri tutub.

Gənclər və İdman Nazirliyi ilə Azərbaycan Su İdmanı Federasiyasının birgə təşkilatçılığı ilə keçirilən turnirin ikinci günündə Azərbaycan avarçəkənləri ümumilikdə daha 7 medal qazanıblar.