Azər İlyasov “Mingəçevir Reqatası”nda qızıl medal qazanıb

Mingəçevir," innews media" — Azərbaycan təmsilçisi Azər İlyasov “Mingəçevir Reqatası-2026” beynəlxalq turnirinin ikinci günündə qızıl medal qazanıb.

"innews media" xəbər verir ki, 2008-2009-cu il təvəllüdlü idmançı 1500 metr məsafəyə 1 nəfərlik akademik avarçəkmə qayığı üzrə yarışda bütün rəqiblərini geridə qoyaraq fəxri kürsünün ən yüksək pilləsinə qalxıb.

Yarışdan sonra danışan İlyasov ilk starta ciddi hazırlaşdıqlarını və əldə etdiyi nəticədən məmnun olduğunu bildirib.

“Akademik avarçəkmə üzrə yığma komandanın üzvüyəm. “Mingəçevir Reqatası-2026” beynəlxalq turnirinin ikinci günündə 1500 metr məsafəyə 1 nəfərlik akademik avarçəkmə qayığı yarışlarında rəqiblərimi geridə qoyaraq qızıl medal qazandım. Buna əzmlə nail oldum, çünki yarışa çox hazırlaşmışdım”, — idmançı deyib.

İlyasov turnirin üçüncü günündə də qızıl medal uğrunda mübarizə aparacağını bildirib.

“Sabah ikinəfərlik qayıqda yarışacağam. Hədəfim orada da birinci yerin sahibi olub, Azərbaycan bayrağını dalğalandırmaqdır. Uğuruma görə üzərimdə əziyyəti olan hər kəsə minnətdaram”, — deyə o əlavə edib.

İdmançı ona dəstək olan ailə üzvlərinə təşəkkür edib, həmçinin federasiyaya yarış üçün yaradılan şəraitə, məşqçilərinə isə hazırlıq prosesində göstərdikləri dəstəyə görə minnətdarlığını bildirib.

Qeyd edək ki, “Mingəçevir Reqatası-2026”nın ikinci yarış günündə Azərbaycan təmsilçiləri ümumilikdə 7 medal qazanıblar.