https://innews.az/uploads/news/2026-10/_innews_0ea1e82265615984a543fea6e_o.jpg
Bakı Dövlət Universitetində (BDU) Tarix fakültəsinin Mənbəşünaslıq, tarixşünaslıq və metodika kafedrasının dosenti Səidə Əli qızının 80 illik yubileyinə həsr olunmuş tədbir keçirilib.
Tədbiri giriş sözü ilə açan BDU-nun rektoru Elçin Babayev insan ömrünün 80 illik zirvəsinin yalnız yaşın ifadəsi olmadığını, bunun keçilmiş həyat yoluna, görülmüş işlərə, yetişdirilmiş tələbələrə, elmə və cəmiyyətə verilmiş töhfələrə nəzər salmaq üçün əlamətdar bir fürsət olduğunu qeyd edib: “Səidə xanımın taleyi uzun illərdir ki, Bakı Dövlət Universiteti ilə sıx bağlıdır. O, 1973-cü ildə BDU-nun Tarix fakültəsini bitirib. Tələbəlik illərində Səidə xanım Aslan Atakişiyev, Yusif Səfərov, Əli Əliyev, Səidə İmanzadə, Ruhulla Orucov, Məmmədəli Hüseynov kimi tanınmış alim və müəllimlərdən dərs alıb, onların zəngin elmi və pedaqoji təcrübəsindən bəhrələnib. Onun bakalavr və magistratura səviyyələrində tədris etdiyi mənbəşünaslıq, tarix elminin metodologiyası, tarixşünaslıq və tarixin tədrisi ilə bağlı fənlər bu baxımdan xüsusi əhəmiyyət daşıyır. Səidə xanımın elmi fəaliyyətinin mühüm istiqamətlərindən birini Azərbaycan ictimai-siyasi fikir tarixinin, xüsusilə görkəmli mütəfəkkir Əhməd bəy Ağaoğlunun zəngin irsinin araşdırılması təşkil edir. Onun çoxsaylı elmi məqalələri, kitabları, tədris və elmi-metodik əsərləri tarix elmimizə xidmət edən uzunmüddətli və ardıcıl fəaliyyətin nəticəsidir. Əhməd bəy Ağaoğlu ilə yanaşı, Azərbaycan Xalq Cümhuriyyəti, milli mətbuat, mənbəşünaslıq və tarixşünaslığın müxtəlif problemləri də Səidə xanımın tədqiqatlarında mühüm yer tutur”.
Rektor Elçin Babayev Universitetin tarixini yalnız araşdırmağın deyil, onun ənənələrini yaşatmağın və gələcək nəsillərə ötürməyin də böyük mənəvi məsuliyyət olduğunu bildirib: “Uzun illər ərzində universitetimizə, Azərbaycan elminə və təhsilinə göstərdiyiniz xidmətlərə görə görkəmli alimimizə təşəkkürümü bildirirəm”.
Sonra rektor Elçin Babayev tərəfindən Səidə Əli qızı uzunmüddətli səmərəli elmi-pedaqoji fəaliyyətinə, gənc nəslin vətənpərvərlik ruhunda tərbiyəsində xidmətlərinə, Universitetin ictimai həyatında fəal iştirakına görə və yubileyi münasibətilə Fəxri fərman ilə təltif olunub.
Milli Məclisin (MM) Elm və təhsil komitəsinin sədri, BDU-nun Mənbəşünaslıq, tarixşünaslıq və metodika kafedrasının müdiri, professor Anar İsgəndərov Səidə Əli qızının Azərbaycan tarixşünaslığında özünəməxsus elmi məktəb formalaşdıran alimlərdən biri olduğunu vurğulayıb. O, yubilyarın uzun illər ərzində mənbələrə və tarixi faktlara əsaslanan araşdırmaları ilə tarix elminin müxtəlif istiqamətlərinin inkişafına verdiyi töhfələrdən danışıb, xüsusilə Azərbaycan ictimai-siyasi fikir tarixinin mühüm şəxsiyyətlərinin irsinin öyrənilməsində onun tədqiqatlarının əhəmiyyətindən söz açıb: “Səidə xanım ədaləti yerində, nəfsi tox, dostluq və sədaqətdə çox möhkəm insandır”.
Daha sonra Anar İsgəndərov yubilyara elm və təhsil naziri Emin Əmrullayevin müvafiq əmri ilə verilən “Azərbaycan Respublikası qabaqcıl təhsil işçisi” döş nişanını və MM-in Elm və təhsil komitəsi adından Fəxri fərmanı təqdim edib.
MM-in sədrinin müavini, BDU-nun professoru Fəzail İbrahimli Səidə Əli qızının yalnız elmi əsərləri ilə deyil, tələbə və gənc tədqiqatçıların formalaşmasına verdiyi töhfələrlə də seçildiyini diqqətə çatdırıb, onun tarixə, elmə və müəllimlik peşəsinə sədaqətini xüsusi vurğulayıb.
BDU-nun Qədim dünya və orta əsrlər tarixi kafedrasının müdiri, akademik Yaqub Mahmudov, Tarix fakültəsinin dekanı, professor İbrahim Zeynalov, MM-in üzvləri Pərvin Kərimzadə, Naqif Həmzəyev və Vasif Qafarov, Bakı Mühəndislik Universitetinin professoru Şikar Qasımov, Yeni Azərbaycan Partiyası Yasamal rayon təşkilatının sədri Bəxtiyar Nəbiyev, Azərbaycan Milli Kitabxanasının direktoru Kərim Tahirov, Azərbaycan Dövlət Pedaqoji Universitetinin kafedra müdiri, dosent Dəyanət Musayev, Bakı Slavyan Universitetinin dekanı, professor Habil Məmmədov, Azərbaycan Dillər Universitetinin dekanı, professor İbrahim Kazımbəyli, Azərbaycan Dövlət İqtisad Universitetinin kafedra müdiri, professor Vəkil Həsənov, Bakı Mühəndislik Universitetinin kafedra müdiri, dosent Hümeyrə Mustafayeva, Azərbaycan Dövlət Mədəniyyət və İncəsənət Universitetinin dosenti Nadir Bədəlov, Sumqayıt Dövlət Universitetinin kafedra müdiri, professor Şirxan Səlimov, Azərbaycan Tarixi Muzeyinin professoru Nərgiz Əliyeva, Azərbaycan Universitetinin kafedra müdiri, dosent Elvin Talışinski və BDU-nun Dünya ədəbiyyatı kafedrasının dosenti Nüşabə Sadıxlı Səidə Əli qızının geniş elmi fəaliyyəti və mənbəşünaslıq elminin inkişafına verdiyi dəyərli töhfələrdən söz açaraq, yubilyarı təbrik ediblər.
Tədbir çərçivəsində Səidə Əli qızının "Azərbaycan tarixinin mənbəşünaslığı" adlı tələbələr üçün dərs vəsaitinin də təqdimatı keçirilib. Dərs vəsaitində Azərbaycan tarixinin öyrənilməsində mühüm əhəmiyyət daşıyan yazılı, arxeoloji, etnoqrafik və digər mənbələr haqqında məlumat verilib. Vəsaitdə tarixi mənbələrin təsnifatı, təhlili və elmi dövriyyəyə cəlb olunması məsələlərinə, eləcə də ayrı-ayrı tarixi dövrlərin mənbəşünaslıq xüsusiyyətlərinə toxunulub.
Tədbirin sonunda söz yubilyara verilib.
BDU-nun Mənbəşünaslıq, tarixşünaslıq və metodika kafedrasının dosenti Səidə Əli qızı göstərilən diqqətə və Universitetin ənənəsinə çevrilən bu cür tədbirlərə görə təşəkkürünü bildirib, bundan sonrakı fəaliyyətini də elmin inkişafına həsr edəcəyini qeyd edib.
Ən son xəbərləri səhifəmizdən də izləyin
