https://innews.az/uploads/news/2026-10/_innews_96bfb4ef005758d01d4fc553c_o.jpg
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “İnternat məzunlarının sosial inteqrasiyası” Gənclər İctimai Birliyi tərəfindən həyata keçirilən “Uğurlu Gələcək Sağlam Gənclikdə Başlayır” layihəsinin icrasına başlanılıb.
Birliyin mətbuat xidmətindən Nəzər.Media saytına verilən məlumata əsasən layihənin əsas məqsədi internat məktəblərində təhsil alan və məzun olmağa hazırlaşan gənclərin psixo-sosial inkişafına dəstək göstərmək, onların özünəinamını və sosial bacarıqlarını gücləndirmək, müstəqil həyata və cəmiyyətə uğurlu inteqrasiyaya hazırlıqlarını artırmaqdır.
Layihə çərçivəsində gənclər üçün təlimlər, seminarlar, terapiyalar və yaradıcılıq fəaliyyətləri təşkil olunacaq. Fəaliyyətlər zamanı şəxsiyyətin formalaşması, motivasiya və şəxsi inkişaf, vaxtın səmərəli idarə olunması, liderlik, düzgün ünsiyyət, empatiya və aqressiyanın idarə olunması, eləcə də qızların şəxsi gigiyena ilə bağlı maarifləndirilməsi kimi mövzulara xüsusi diqqət yetiriləcək.
Layihənin əsas istiqamətlərindən biri də gənclərin gələcək peşə və əmək həyatına hazırlanmasıdır. İştirakçılara müasir peşələr, düzgün peşə seçimi, əmək bazarının tələbləri və peşə təhsili imkanları barədə məlumat veriləcək. Eyni zamanda, Dövlət Məşğulluq Agentliyinin tabeliyində fəaliyyət göstərən peşə təhsili müəssisələrinə qəbul imkanları və mövcud istiqamətlər barədə maarifləndirmə işləri aparılacaq.
Qızların şəxsi gigiyena ilə bağlı bilik və vərdişlərinin artırılması da layihənin mühüm istiqamətlərindən biri hesab olunur. Maarifləndirici sessiyalar vasitəsilə onların sağlamlıq, özünəqayğı və şəxsi gigiyena sahəsində məlumatlılığının artırılması, sağlam və özünəinamlı həyat tərzinin təşviqi nəzərdə tutulub.
Layihə çərçivəsində təşkil olunacaq ekskursiyalar, peşə müəssisələrinə və yaradıcılıq mərkəzlərinə səfərlər gənclərin praktiki bilik və təcrübə qazanmasına, gələcək təhsil və peşə seçimlərini daha düzgün müəyyənləşdirməsinə, həmçinin sosial bacarıqlarının inkişafına şərait yaradacaq.
Ən son xəbərləri səhifəmizdən də izləyin
