https://innews.az/uploads/news/2026-10/_innews_15601c5486779d3bfbadcfbaa_o.jpg
Litva bu il Bakıda keçiriləcək “Study in Europe” təhsil sərgisində səkkiz ali təhsil müəssisəsi ilə təmsil olunacaq.
Bu barədə Litvanın Azərbaycandakı səfiri Kęstutis Vaškelevičius oktyabrın 7-də Landmarkda “Study in Europe” təhsil sərgisinin təqdimatı ilə bağlı keçirilən media brifinqində çıxışı zamanı bildirib.
Səfirin sözlərinə görə, sərgidə Litvanı VILNIUS TECH, Kauno kolegija, Vilnüs Universiteti, Litva İdman Universiteti, Vytautas Magnus Universiteti, Litva Energetika İnstitutu, Vilnüs Biznes Kolleci və LCC Beynəlxalq Universiteti təmsil edəcək.
Diplomat qeyd edib ki, bu ali təhsil müəssisələri İT, mühəndislik, energetika, biznes, humanitar və sosial elmlər, eləcə də idman daxil olmaqla geniş istiqamətlər üzrə təhsil imkanları təqdim edir.
“Litva və Azərbaycan coğrafi baxımdan bir-birindən uzaqda yerləşə bilər, lakin təhsil ölkələrimizi, xüsusilə də gənclərimizi bir-birinə daha da yaxınlaşdırır”, — səfir vurğulayıb.
Kęstutis Vaškelevičius bildirib ki, təhsil Litvanın müstəqilliyini bərpa etdikdən sonra keçdiyi transformasiya prosesinin əsas dayaqlarından biri olub.
Onun sözlərinə görə, azadlıq Litvaya böyük hədəflər müəyyənləşdirmək imkanı verib, təhsil isə ölkənin innovasiyalar və sahibkarlıqla seçilən müasir Avropa dövlətinə çevrilməsinə mühüm töhfə verib.
Səfir xüsusilə həyat elmləri, lazer texnologiyaları, fintech və İT sahələrində Litvanın əldə etdiyi nailiyyətləri qeyd edib və bu təcrübənin Azərbaycan tələbələri və akademik tərəfdaşlarla bölüşülməsinin əhəmiyyətini vurğulayıb.
Litvada 16 mindən çox beynəlxalq tələbə təhsil alır
Səfir Litvanın xarici tələbələr üçün getdikcə daha cəlbedici təhsil məkanına çevrildiyini bildirib.
Onun sözlərinə görə, 2025–2026-cı tədris ilində Litvanın ali təhsil müəssisələrində 16 610 beynəlxalq tələbə təhsil alıb. Azərbaycanlı tələbələrin sayı isə təxminən 400 nəfər təşkil edir.
“Onlar akademik icmalarımızın mühüm hissəsidir və özləri ilə yeni baxışlar, ideyalar və əlaqələr gətirirlər. Azərbaycanlı tələbələr də bu beynəlxalq mühitə öz töhfələrini verirlər”, — Kęstutis Vaškelevičius deyib.
Səfir qeyd edib ki, Litva ilə Azərbaycan arasında əməkdaşlıq yalnız tələbə mübadiləsi ilə məhdudlaşmır.
Onun sözlərinə görə, Vytautas Magnus Universiteti ADA Universiteti və Xəzər Universiteti ilə akademik əlaqələrə malikdir. VDU kənd təsərrüfatı və baytarlıq sahələrində akademik əməkdaşlıq imkanlarını da araşdırır.
Vilnüs Universiteti və Kaunas Texnologiya Universiteti ADA Universiteti ilə tərəfdaşlıq edir. Mykolas Romeris Universiteti isə Azərbaycan Dövlət İqtisad Universiteti ilə əməkdaşlıq həyata keçirir.
VILNIUS TECH-in Xəzər Universiteti və Azərbaycan Turizm və Menecment Universiteti ilə sahibkarlıq təhsili və universitet-biznes əməkdaşlığı sahələrində əməkdaşlıq etdiyi, həmçinin Bakı Mühəndislik Universiteti ilə akademik və elmi-tədqiqat əlaqələrinin genişləndirilməsi imkanlarını araşdırdığı bildirilib.
Səfirliyin də Xəzər Universiteti ilə, o cümlədən tərcümə sahəsində əməkdaşlığı davam etdirdiyi qeyd olunub.
Litva azərbaycanlı tələbələrə nə təklif edir?
Kęstutis Vaškelevičius Litvanın azərbaycanlı gənclər üçün bir sıra imkanlar yaratdığını diqqətə çatdırıb.
İlk növbədə, səfir ölkədə ingilis dilində tədris olunan 500-dən çox təhsil proqramının olduğunu bildirib.
O qeyd edib ki, Litva universitetləri akademik bilikləri praktiki bacarıqlar və biznes əlaqələri ilə birləşdirir. Xüsusilə texnologiya, mühəndislik, həyat elmləri və sahibkarlıq sahələrində formalaşmış ekosistem tələbələrin həm təhsil almasına, həm də peşəkar inkişafına imkan yaradır.
Səfir həmçinin Litvada təhsil və yaşayış xərclərinin nisbətən əlverişli olduğunu vurğulayıb.
Onun sözlərinə görə, Azərbaycan vətəndaşları 2011-ci ildən etibarən tam zamanlı magistratura təhsili üçün Litvanın dövlət təqaüdləri üzrə müsabiqədə iştirak edə bilirlər. Ölkə həmçinin qısamüddətli təhsil proqramlarını, eləcə də Litva dili və mədəniyyəti kurslarında iştirakı dəstəkləyir.
Digər üstünlük isə məzunların ölkədə qalaraq peşəkar fəaliyyət imkanlarını araşdırmasıdır. Müvafiq yaşayış və miqrasiya tələblərinə cavab verən beynəlxalq məzunlar təhsillərini başa vurduqdan sonra iş axtarmaq üçün Litvada 15 aya qədər qala bilərlər.
Səfir Litvanın tələbələr üçün təhlükəsiz və balanslı mühit təqdim etdiyini də qeyd edib.
“Litva 2026-cı il Qlobal Sülh İndeksində 24-cü yerdə qərarlaşıb. Tələbələr üçün isə təhsil alacaqları ölkəni seçmək həm də özlərini rahat hiss edə biləcəkləri, dostlar qazana və şəxsiyyət kimi inkişaf edə biləcəkləri bir məkan seçmək deməkdir”, — diplomat bildirib.
Səfir azərbaycanlı gəncləri Litvada təhsil almağa dəvət edib
Kęstutis Vaškelevičius “Study in Europe” sərgisinin tələbələr və onların ailələri üçün mühüm imkan yaratdığını deyib.
O bildirib ki, sərgi çərçivəsində universitet nümayəndələri ilə birbaşa görüşmək, təhsil proqramları, təhsil haqları, təqaüdlər, yaşayış imkanları və qəbul prosesi ilə bağlı praktiki suallar vermək mümkündür.
Səfir Litvada təhsil almaq istəyən azərbaycanlı tələbələrə studyin.lt portalından başlamağı və müraciət, eləcə də yaşayış icazəsi üçün tələb olunan sənədləri əvvəlcədən hazırlamağı tövsiyə edib.
“Gənc azərbaycanlıları maraq, istedad və ambisiyalarını özləri ilə gətirməyə dəvət edirəm. Sizi Litvada qarşılamaqdan böyük məmnunluq duyacağıq”, — səfir bildirib.
O əlavə edib ki, hər bir tələbə mübadiləsi yeni bilik, qarşılıqlı anlaşma və dostluq əlaqələri yaradır və bu əlaqələr uzun illər ərzində Azərbaycan ilə Litva arasında münasibətlərin daha da möhkəmlənməsinə xidmət edə bilər.
Ən son xəbərləri səhifəmizdən də izləyin
