https://innews.az/uploads/news/2026-10/_innews_c16ed25030526198fe6a16585_o.jpg
Kənd Təsərrüfatı Nazirliyi yanında Aqrar Xidmətlər Agentliyi tərəfindən işğaldan azad olunmuş ərazilərdə əhalinin aqrar xidmətlərə əlçatanlığının təmin edilməsi, kənd təsərrüfatı fəaliyyətinin dəstəklənməsi və təsərrüfatlarda yerində xidmət göstərilməsi məqsədilə həyata keçirilən sahə görüşləri davam edir. Növbəti tədbirlər Xocalı rayonunun Seyidbəyli, Ballıca və Xanyurdu kəndlərində, eləcə də Xocavənd rayonunun Qırmızı Bazar qəsəbəsində keçirilib. Görüşlər zamanı ümumilikdə 20 təsərrüfata baxış keçirilib, təsərrüfatların vəziyyəti yerində qiymətləndirilib və təsərrüfat sahiblərinə mövcud resurslardan düzgün istifadə ilə bağlı müvafiq tövsiyələr verilib.
Görüşlərin əsas məqsədi işğaldan azad olunmuş ərazilərdə məskunlaşan sakinlərə təsərrüfat fəaliyyətinin səmərəli təşkili ilə bağlı praktiki dəstək göstərmək, heyvan və bitki sağlamlığının qorunması, məhsuldarlığın artırılması və qabaqlayıcı tədbirlərin görülməsi istiqamətində maarifləndirmə aparmaqdır.
Proqram çərçivəsində Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzi, Bitki Mühafizəsi və Fumiqasiya (zərərsizləşdirmə) Mərkəzi, Laboratoriya və Sertifikatlaşdırma Mərkəzi, eləcə də Aqrar Təlim Mərkəzinin əməkdaşları tərəfindən sakinlərə və təsərrüfat sahiblərinə yerində aqrar xidmətlər göstərilib, o cümlədən səyyar baytarlıq xidmətləri həyata keçirilib, heyvan və bitkilərin sağlamlıq vəziyyəti qiymətləndirilib, müayinələr aparılıb, baytarlıq xidmətlərinin əhəmiyyəti barədə məlumatlandırma həyata keçirilib, xəstəlik və zərərvericilərin erkən aşkarlanması və qarşısının alınması ilə bağlı tədbirlər görülüb, həmçinin müasir aqrotexniki üsulların tətbiqi, təsərrüfatların səmərəli idarə olunması və aqrar xidmətlərdən düzgün istifadə ilə bağlı praktiki tövsiyələr verilib.
Həmçinin, sahə görüşləri zamanı təsərrüfat sahiblərinin müraciətləri dinlənilib, onları maraqlandıran suallar cavablandırılıb və aqrar sahədə mövcud imkanlar barədə ətraflı məlumat verilib. Əməkdaşlar tərəfindən kənd təsərrüfatı heyvanlarının sağlamlığının qorunması, bitki xəstəlikləri və zərərvericilərə qarşı mübarizə, məhsuldarlığın artırılması, eləcə də təsərrüfatlarda qabaqlayıcı tədbirlərin görülməsi ilə bağlı izahlar aparılıb.
Aqrar Xidmətlər Agentliyi tərəfindən işğaldan azad olunmuş ərazilərdə bu istiqamətdə sahə görüşlərinin və yerində xidmətlərin davam etdirilməsi, sakinlərin və təsərrüfat sahiblərinin aqrar xidmətlərdən daha səmərəli yararlanmasına, kənd təsərrüfatının inkişafına və dayanıqlı təsərrüfatçılığın formalaşdırılmasına töhfə verməyə xidmət edir.
Ən son xəbərləri səhifəmizdən də izləyin
