https://innews.az/uploads/news/2026-10/_innews_9151fb969cc64f8c95330b2e6_o.jpg
Layihənin təlim mərhələsi çərçivəsində Naxçıvan Dövlət Universitetində tələbələrin natiqlik, nitq və debat bacarıqlarının inkişafına yönəlmiş təlimlər təşkil olunub.
Təlimlər zamanı iştirakçılara effektiv nitq və ünsiyyətin əsas prinsipləri, fikrin aydın və ardıcıl ifadə olunması, auditoriya qarşısında özünü düzgün təqdimetmə, inandırıcı çıxış və təqdimat bacarıqları barədə praktiki məlumatlar verilib. Bu istiqamətdə “Natiqlik və nitq bacarıqlarının inkişafı” mövzusunda təlim keçirilib.
Bununla yanaşı, iştirakçıların debat bacarıqlarının formalaşdırılması və inkişaf etdirilməsi məqsədilə “Debat strukturu və metodologiyası” adlı təlim təşkil olunub. Təlim çərçivəsində debatın əsas prinsipləri və strukturu, arqument qurmaq, mövqeni əsaslandırmaq, qarşı tərəfin arqumentlərinə münasibət bildirmək və debat zamanı effektiv çıxış etmək bacarıqları izah edilib. Təlimin praktiki hissəsində iştirakçılar debat oyunları vasitəsilə əldə etdikləri bilikləri tətbiq etmək imkanı qazanıblar. Qeyd edək ki, oyunların final mərhələsi yaxın günlərdə keçiriləcək.
Təlimlərdə ümumilikdə 200-ə yaxın tələbə iştirak edib. Təlimlərin əsas məqsədi gənclərin ictimai çıxış, nitq, təqdimat və debat bacarıqlarını inkişaf etdirməklə yanaşı, onları iqlim dəyişmələri və ekoloji məsələlər ətrafında fikir formalaşdırmağa, mövqelərini əsaslandırmağa və ictimai müzakirələrdə fəal iştirak etməyə təşviq etmək olub.
Qeyd edək ki, “İqlim dəyişmələri mövzusunda debatların təşkili” layihəsi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və BP Azərbaycan şirkətinin birgə maliyyə dəstəyi, “Vətəndaş Cəmiyyətində Debat” İctimai Birliyinin təşkilatçılığı ilə həyata keçirilir.
Ən son xəbərləri səhifəmizdən də izləyin
