https://innews.az/uploads/news/2026-10/_innews_7e4fd9341a879b00504ef3242_o.jpg
Vətən müharibəsi şəhidi leytenant Elməddin Niyaməddin oğlu Qəhrəmanovun anım tədbiri keçirilib.
Kəngərli rayonunun Qıvraq qəsəbəsində Vətən müharibəsində şəhidlik zirvəsinə ucalmış leytenant Elməddin Niyaməddin oğlu Qəhrəmanovun anım günü münasibətilə müqəddəs məzarı önündə tədbir keçirilib.
Tədbir Azərbaycanın müstəqilliyi, suverenliyi və ərazi bütövlüyü uğrunda canlarını fəda etmiş şəhidlərimizin əziz xatirəsinin sükutla yad edilməsi ilə başlayıb, Azərbaycan Respublikasının Dövlət Himni səsləndirilib.
Ardınca dini icmanın sədri tərəfindən Qurani-Kərimdən ayələr oxunub, şəhidlərin ruhuna dualar edilib.
Tədbirdə çıxış edən Kəngərli Rayon İcra Hakimiyyəti başçısının müavini Cəlil Rüstəmov şəhid leytenant Elməddin Qəhrəmanovun keçdiyi döyüş yolundan, Vətənə sədaqətindən və qəhrəmanlığından bəhs edib. Bildirib ki, Vətən müharibəsində Azərbaycan əsgər və zabitlərinin göstərdiyi igidlik, fədakarlıq və döyüş əzmi xalqımızın qəhrəmanlıq tarixində xüsusi yer tutur. Müzəffər Ali Baş Komandan İlham Əliyevin rəhbərliyi ilə qazanılan tarixi Zəfər Azərbaycan xalqının birliyinin, ordumuzun gücünün və Vətən sevgisinin təntənəsidir.
Cəlil Rüstəmov qeyd edib ki, şəhidlərimizin əziz xatirəsi xalqımızın qəlbində daim yaşayacaq, onların qəhrəmanlığı heç vaxt unudulmayacaq. O, şəhid ata və analarının göstərdikləri mənəvi gücün, səbrin və Vətənə bağlılığın hər zaman dərin hörmətə layiq olduğunu vurğulayıb.
Çıxışında şəhid ailələrinə və müharibə iştirakçılarına göstərilən dövlət qayğısına da toxunan Cəlil Rüstəmov Prezident cənab İlham Əliyevin və Birinci vitse-prezident Mehriban xanım Əliyevanın bu kateqoriyadan olan insanlara daim diqqət və qayğı ilə yanaşdıqlarını bildirib.
Sonra şəhid atası Əbülfət Əliyev, şəhid anası Rəna Hüseynova, Naxçıvan Qaziləri İctimai Birliyinin sədri Əli Əlisoy, “Zəfər hekayələri” layihəsinin rəhbəri Bahar Mehraliyeva, şəhid Sirac Əsədovun qardaşı Sübut Əsədov, hərbçi və digər çıxış edənlər şəhidlərimizin vətən uğrunda göstərdikləri qəhrəmanlıq və fədakarlıqdan, Vətən müharibəsində qazanılan tarixi Zəfərin xalqımızın həyatındakı əhəmiyyətindən bəhs ediblər. Çıxışlarda Şəhidlərimizin əziz xatirəsinin daim ehtiramla yad ediləcəyi, onların Vətən qarşısında xidmətlərinin heç vaxt unudulmayacağı vurğulanıb.
Daha sonra şagirdlər tərəfindən şəhidlərimizin əziz xatirəsinə həsr olunmuş şeirlər səsləndirilib.
Tədbirin sonunda şəhidlərin müqəddəs məzarları ziyarət olunub, məzarları önünə tər qərənfillər düzülərək əziz xatirələri dərin ehtiramla yad edilib. Sonda tədbir iştirakçıları ilə birlikdə xatirə fotoları çəkdirilib.
Ən son xəbərləri səhifəmizdən də izləyin
