https://innews.az/uploads/news/2026-10/_innews_5d4291c8b97ca2f158a1b78f4_o.jpg
Regional bağlantıların konkret investisiya layihələrinə çevrilməsi oktyabrın 6-da Bakıda Alman-Azərbaycan Xarici Ticarət Palatasının (AHK Azərbaycan) təşkilatçılığı ilə keçirilən Alman-Azərbaycan Strateji Tərəfdaşlıq və Bağlantılar Konfransı 2026 tədbirinin əsas mövzusu olub. Dövlət qurumlarının, biznes dairələrinin və maliyyə institutlarının nümayəndələrini, o cümlədən Almaniyadan 35-dən çox qonağı bir araya gətirən konfransda nəqliyyat, enerji və rəqəmsal infrastrukturun ikitərəfli əməkdaşlıq üçün yaratdığı imkanlar nəzərdən keçirilib.
İştirakçıları salamlayan AHK Azərbaycanın icraçı direktoru Nargiz Wieck mövcud ticarət əlaqələrinin birgə layihələrlə genişləndirilməsinin və Almaniya ilə Azərbaycan şirkətlərinin beynəlxalq dəyər zəncirlərinə daha sıx inteqrasiyasının əhəmiyyətini vurğulayıb. O, Alman-Azərbaycan Biznes Məsləhət Şurasının dövlət və biznes arasında dialoqun gücləndirilməsi, maneələrin aradan qaldırılması və konkret əməkdaşlıq imkanlarının inkişaf etdirilməsindəki rolunu qeyd edib.
Bu yanaşmanı dəstəkləyən Almaniyanın Azərbaycandakı səfiri Dirk Lölke Prezident İlham Əliyevin Berlinə səfərinin və İkitərəfli Tərəfdaşlığın Strateji Gündəliyinə dair Birgə Bəyannamənin münasibətlərə yeni təkan verdiyini bildirib. Səfir bağlantılar sahəsinin enerji ilə yanaşı, iki ölkə arasında iqtisadi əməkdaşlığın ikinci əsas sütununa çevrilə biləcəyinə əminliyini ifadə edib.
İqtisadiyyat nazirinin müavini Səməd Bəşirli alman istehsalçılarının sabit makroiqtisadi mühit, əlverişli investisiya iqlimi və tranzit-logistika potensialından yararlanaraq ölkəmizdə fəaliyyətlərini genişləndirmək imkanlarını qeyd edib, sahibkarlara yeni dövlət dəstəyi mexanizmləri barədə məlumat verib. O, Ələt Azad İqtisadi Zonasının ixracyönümlü istehsal üçün önəmli platforma olduğunu bildirib, sənaye, logistika obyektləri və rəqəmsal xidmətlər daxil olmaqla iqtisadiyyatın müxtəlif sahələrində özəl investisiya imkanlarından bəhs edib.
Enerji əməkdaşlığının genişlənməsinə toxunan energetika nazirinin müavini Elnur Soltanov təbii qaz təchizatının Azərbaycanla Almaniya arasında uzunmüddətli enerji tərəfdaşlığına yeni istiqamət əlavə etdiyini bildirib. Bərpa olunan enerji, enerji səmərəliliyi və elektrik enerjisi bağlantılarını gələcək əməkdaşlığın prioritetləri kimi qeyd edən nazir müavini 2032-ci ilədək 8 QVt gücündə külək və günəş enerjisi layihələrinin həyata keçirilməsinin planlaşdırıldığını diqqətə çatdırıb. O, məqsədin Xəzər-Qara dəniz-Avropa Yaşıl Enerji Dəhlizi və digər regional marşrutlar vasitəsilə Azərbaycanın enerji potensialını Avropa bazarları ilə əlaqələndirmək olduğunu vurğulayıb.
Konfransın ikinci hissəsi Rəqəmsal İnkişaf və Nəqliyyat nazirinin müavini Rəşad Həsənovun açılış nitqi ilə başladı. O, Azərbaycanın aparıcı beynəlxalq texnologiya şirkətləri üçün regional mərkəzə çevrilmək hədəfini vurğuladı. Ölkənin strateji coğrafi mövqeyinə və inkişaf edən rəqəmsal infrastrukturuna diqqət çəkən Rəşad Həsənov qeyd etdi ki, Azərbaycan qlobal texnologiya şirkətləri üçün regional baza kimi mövqeyini gücləndirməyi hədəfləyir. O, həmçinin rəqəmsallaşmanın Orta Dəhlizin səmərəliliyinin artırılmasında və Azərbaycanın Avropa ilə Asiya arasında körpü rolunun möhkəmləndirilməsində mühüm əhəmiyyət daşıdığını vurğuladı.
Bu baxışların davamı olaraq, konfrans çərçivəsində infrastruktur və enerji, investisiyaların maliyyələşdirilməsi, nəqliyyat və logistika, eləcə də rəqəmsallaşma mövzularını əhatə edən dörd panel müzakirəsi keçirildi. Biznes, dövlət və maliyyə institutlarının nümayəndələri bağlantı layihələrinin sürətləndirilməsi, investisiyaların səfərbər olunması və Orta Dəhliz boyunca regional əməkdaşlığın gücləndirilməsi imkanlarını müzakirə etdilər.
Daha sonra nəqliyyat və logistika infrastrukturu, yaşıl enerjiyə keçid, rəqəmsallaşma və ticarət mövzularında üç biznes–dövlət (B2G) dəyirmi masası keçirilib. Bu sessiyalar şirkətlər və dövlət qurumlarının nümayəndələri arasında layihə ehtiyacları, investisiya şərtləri və icra prosesindəki praktik maneələr barədə birbaşa fikir mübadiləsinə imkan yaradıb.
Dövlətin inkişaf prioritetlərini şirkətlərin təcrübəsi və maliyyələşdirmə imkanları ilə əlaqələndirən tədbir birgə layihələrin irəlilədilməsinə və uzunmüddətli Alman-Azərbaycan biznes tərəfdaşlıqlarının möhkəmləndirilməsinə xidmət edib.
AHK Azərbaycan göstərdikləri dəstəyə görə Eksklüziv Platin Tərəfdaşları - Ələt Azad İqtisadi Zonası və Azər Türk Banka; Platin Tərəfdaşları - Commerzbank, Rhenus Logistics, Roland Berger və Silk Way West Airlines-a; Qızıl Tərəfdaşları - PASHA Holding, PwC və VNG-yə təşəkkürünü bildirir.
Ən son xəbərləri səhifəmizdən də izləyin
