https://innews.az/uploads/news/2026-10/_innews_9b79d2aff63171e9796160755_o.jpg
Mərkəzi Bankın Risklərin idarə edilməsi departamentinin direktoru Məhəmməd Məhərrəmli və Maliyyə sektorunun inkişafı şöbəsinin rəisi Nərgiz Şirəliyeva Avropa Yenidənqurma və İnkişaf Bankının (AYİB) Ticarətin Sürətləndirilməsi Proqramı çərçivəsində təşkil olunmuş tədbirlərdə çıxış ediblər.
Onlar real sektorun maliyyələşmə imkanlarının genişləndirilməsi, alternativ maliyyələşdirmə alətlərinin inkişafı və bu istiqamətdə həyata keçirilən təşəbbüslərin Mərkəzi Bankın “2024-2026-cı illərdə Maliyyə sektorunun inkişaf Strategiyası”nda müəyyən edilmiş prioritetlər sırasında olduğunu qeyd ediblər. Əlavə olaraq faktorinq əməliyyatlarının inkişafı, maliyyələşdirilmiş qaimələrin reyestrinin yaradılması və maliyyə sektorunun bu sistemə inteqrasiyası, eləcə də aktiv əsaslı maliyyələşdirmə imkanlarının genişləndirilməsi istiqamətində görülən işləri diqqətə çatdırıblar.
Tədbir iştirakçılarına alternativ maliyyələşdirmə mexanizmlərinin inkişafı və tətbiqi üçün müvafiq qanunvericiliyə təklif olunan dəyişikliklər, habelə bu sahədə hüquqi çərçivənin təkmilləşdirilməsi istiqamətində həyata keçirilən təşəbbüslər barədə də məlumat verilib.
Qeyd edək ki, bu tədbirlərin məqsədi biznes nümayəndələrinin xarici ticarətin maliyyələşdirilməsi sahəsində biliklərinin artırılmasına, beynəlxalq təcrübə ilə tanışlığına və yeni əməkdaşlıq imkanlarının formalaşmasına töhfə vermək olub.
Ən son xəbərləri səhifəmizdən də izləyin
