https://innews.az/uploads/news/2026-10/_innews_28c3ca9840583969ab9d74bd6_o.jpg
Kəngərli rayonunun Şahtaxtı kəndində Vətən müharibəsində şəhidlik zirvəsinə ucalmış əsgər Elməddin Elşən oğlu Həsənovun anım günü münasibətilə müqəddəs məzarı önündə tədbir keçirilib.
Tədbir Azərbaycanın müstəqilliyi, suverenliyi və ərazi bütövlüyü uğrunda canlarını fəda etmiş şəhidlərimizin əziz xatirəsinin sükutla yad edilməsi ilə başlayıb, Azərbaycan Respublikasının Dövlət Himni səsləndirilib.
Ardınca dini icmanın sədri tərəfindən Qurani-Kərimdən ayələr oxunub, şəhidlərin ruhuna dualar edilib.
Tədbirdə çıxış edən Kəngərli Rayon İcra Hakimiyyətinin başçısı Kamal Ələkbərov şəhid Elməddin Həsənovun keçdiyi şərəfli döyüş yolundan və göstərdiyi qəhrəmanlıqlardan danışıb. Oktyabrın 25-nin Qubadlı şəhəri günü olduğunu xatırladan icra başçısı Elməddin Həsənovun da məhz Qubadlı uğrunda gedən döyüşlərdə şəhidlik zirvəsinə ucaldığını vurğulayıb. O, şəhidin Vətən qarşısındakı xidmətlərinin dövlətimiz tərəfindən yüksək qiymətləndirildiyini qeyd edərək, Müzəffər Ali Baş Komandan, Prezident cənab İlham Əliyevin müvafiq Sərəncamları ilə onun təltif olunduğu orden və medalları diqqətə çatdırıb.
İcra başçısı Müzəffər Ali Baş Komandanın rəhbərliyi ilə qazanılan şanlı Zəfərin xalqımızın sarsılmaz birliyinin təzahürü olduğunu vurğulayıb. Qeyd olunub ki, canları və qanları bahasına bu böyük Qələbəni bizə bəxş edən şəhidlərimiz həm də Ulu Öndərin və bütün Azərbaycan xalqının çoxillik müqəddəs arzularını gerçəkləşdiriblər.
Sonra çıxış edən şəhid ata və anaları, qazilər, hərbçilər və digər natiqlər Vətən müharibəsi qəhrəmanlarının göstərdiyi şücaətdən bəhs edərək, şəhidlərimizin əziz xatirəsinin hər zaman uca tutulacağını vurğulayıblar. Onlar şəhid ailələrinə və qazilərə göstərilən dövlət qayğısına görə minnətdarlıqlarını bildiriblər.
Daha sonra şagirdlər tərəfindən şəhidlərimizin əziz xatirəsinə həsr olunmuş şeirlər səsləndirilib.
Tədbirin sonunda şəhidlərin müqəddəs məzarları ziyarət olunub, məzarları önünə tər qərənfillər düzülərək əziz xatirələri dərin ehtiramla yad edilib. Sonda tədbir iştirakçıları ilə birlikdə xatirə fotoları çəkdirilib.
Ən son xəbərləri səhifəmizdən də izləyin
