https://innews.az/uploads/news/2026-11/_innews_5e4335cd05351a26bcc8af545_o.jpg
8 Noyabr – Zəfər Günü ərəfəsində Laçın rayonunda yaşayan şəhid ailələri ziyarət olunub.
Ziyarətlərdə Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov, Laçın rayonunda Bərpa, Tikinti və İdarəetmə Xidmətinin icraçı direktoru Rafiq Salmanov, Xidmətin və xüsusi nümayəndəliyin əməkdaşları, həmçinin Dövlət Məşğulluq Agentliyinin Şərqi Zəngəzur Regional Məşğulluq filialının Laçın rayon xidmət şöbəsinin, Laçın Arıçılar Birliyinin, Həkəri Balıq Təsərrüfatının və “OBA” marketlər şəbəkəsinin nümayəndələri iştirak ediblər.
Görüş iştirakçıları əvvəlcə Azərbaycanın Milli Qəhrəmanı Oqtay Güləliyevin evində olublar. Şəhidin həyat yoldaşı Afət Novruzova ilə söhbət zamanı Milli Qəhrəmanın Vətən qarşısındakı xidmətləri və qəhrəmanlıq yolu ehtiramla yad edilib, ailənin qayğıları ilə maraqlanılıb.
Görüş zamanı Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusunun qazandığı tarixi Zəfərdən bəhs olunub. Qeyd edilib ki, bu Qələbə minlərlə qəhrəman Vətən övladının canı və qanı, Azərbaycan əsgər və zabitlərinin igidliyi və rəşadəti sayəsində əldə edilib.
Daha sonra Azərbaycanın Milli Qəhrəmanı İsrafil Şahverdiyevin ailəsinə baş çəkilib. Şəhidin həyat yoldaşı Hökumə Şahverdiyeva ilə görüş zamanı Milli Qəhrəmanın şərəfli döyüş yolu və Vətən qarşısındakı xidmətləri xatırlanıb, ailənin qayğıları ilə maraqlanılıb.
Şəhid ailələri onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
Gün ərzində Laçın rayonunda yaşayan digər şəhid ailələri də ziyarət olunub, onlarla görüşlər keçirilib, ailələrin qayğıları ilə maraqlanılıb və şəhidlərin əziz xatirəsi ehtiramla yad edilib.
Ən son xəbərləri səhifəmizdən də izləyin
