https://innews.az/uploads/news/2026-11/_innews_ce26e3368d129b01f3ba60b07_o.jpg
Azərbaycan Respublikası Gənclər Fondunun dəstəyi ilə həyata keçirilən “Şüurlu Ata – Sağlam Gələcək” layihəsi çərçivəsində 14 noyabr 2026-cı il tarixində Masallı şəhərində atalar və gələcəkdə ata olmağa hazırlaşan şəxslər üçün maarifləndirici təlim-forum təşkil olunacaq.
Layihə Azərbaycan Respublikası Gənclər Fondunun “Gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsi” çərçivəsində həyata keçirilir.
Layihənin əsas məqsədi ailə daxilində valideyn məsuliyyətinin bölüşdürülməsini təşviq etmək, ataların doğuşsonrası dövrdə ana və uşağın həyatında fəal iştirakını dəstəkləmək, eləcə də cəmiyyətdə şüurlu atalıq anlayışını təşviq etməkdir.
Layihəni fərqləndirən əsas cəhət ataların valideynliyə hazırlıq prosesinə kompleks şəkildə cəlb edilməsidir. Ənənəvi olaraq ana və uşağın sağlamlığı, hamiləlik və körpəyə qulluqla bağlı maarifləndirmə proqramlarında əsas diqqət analara yönəldildiyi halda, bu təşəbbüs ataların da həmin prosesə tibbi, praktiki və psixoloji baxımdan hazırlanmasını hədəfləyir. Layihə çərçivəsində mama-ginekoloq, pediatr və psixoloqun iştirakı ilə atalar üçün vahid təlim proqramı təşkil olunacaq.
Təlim-forum 14 noyabr tarixində, saat 11:00-da Masallı şəhərində keçiriləcək və 50-dən çox iştirakçını bir araya gətirəcək.
Təlimdə səhiyyə və psixologiya sahələrinin mütəxəssisləri – cərrah-mama-ginekoloqlar Dr. Xatirə Şeyx-Zadə və Dr. Fatimə Oruczadə, pediatr Dr. Sahilə Ələkbərova, uşaq və ailə psixoloqu Süsən Axundova iştirak edəcəklər.
Proqram çərçivəsində mama-ginekoloqlar hamiləlik və doğuşsonrası dövrdə ananın fiziki və emosional vəziyyəti, atanın bu mərhələdə göstərə biləcəyi dəstək, ailədaxili məsuliyyətin bölüşdürülməsi və ana sağlamlığının qorunmasında həyat yoldaşının iştirakının əhəmiyyəti barədə məlumat verəcəklər.
Pediatr tərəfindən yenidoğulmuşun sağlamlığı, körpəyə düzgün qulluq, ilkin baxım prinsipləri və uşağın həyatının ilk mərhələlərində valideynlərin diqqət yetirməli olduqları məqamlar izah ediləcək. Xüsusilə ataların körpə baxımı prosesində fəal iştirakının əhəmiyyəti diqqətə çatdırılacaq.
Təlimin praktiki hissəsində xüsusi tədris maketləri üzərində körpənin düzgün qucaqda saxlanılması, götürülməsi, təhlükəsiz yatızdırılması və gündəlik qulluq qaydaları nümayiş etdiriləcək. İştirakçılar maketlər üzərində praktiki məşğələlərdə iştirak edərək körpəyə qulluqla bağlı ilkin bacarıqlar əldə etmək imkanı qazanacaqlar.
Tədbirin digər mühüm istiqamətini psixoloji maarifləndirmə sessiyası təşkil edəcək. Uşaq və ailə psixoloqu tərəfindən 0–5 yaş dövründə ata-uşaq emosional bağının formalaşması, atanın uşağın psixoloji və emosional inkişafındakı rolu, doğuşsonrası dövrdə anaların qarşılaşa biləcəyi emosional dəyişikliklər, ataların adaptasiya prosesi və ailədaxili qarşılıqlı dəstəyin əhəmiyyəti müzakirə olunacaq.
Təlim-forumun sonunda keçiriləcək sual-cavab sessiyası iştirakçılara onları maraqlandıran sualları birbaşa mütəxəssislərə ünvanlamaq, valideynlik prosesində qarşılaşa biləcəkləri məsələlər barədə məlumat almaq və peşəkar tövsiyələr əldə etmək imkanı yaradacaq.
“Şüurlu Ata – Sağlam Gələcək” layihəsi ailə rifahının gücləndirilməsinə, valideynlik məsuliyyətinin paylaşılmasına və uşaqların sağlam inkişafı üçün dəstəkləyici ailə mühitinin formalaşdırılmasına töhfə verməyi hədəfləyir. Layihə çərçivəsində ataların yalnız ailənin maddi təminatında deyil, uşağın fiziki, emosional və psixoloji inkişafında da fəal iştirakının təşviqi əsas prioritetlərdəndir.
Ən son xəbərləri səhifəmizdən də izləyin
