https://innews.az/uploads/news/2026-11/_innews_acd4d7ce2b8530c65e14821ed_o.jpg
Azərbaycan Respublikasının Gənclər Fondunun maliyyə dəstəyi, “ASAN Könüllüləri” Təşkilatının və “ASAN Müraciət” İnformasiya Sisteminin tərəfdaşlığı ilə “Gənclik 360 Platforması” layihəsi həyata keçirilir. Azərbaycan Respublikasının Gənclər Fondunun gənclər təşkilatları və gənclər üçün inkişaf, innovasiya və sosial təşəbbüslər üzrə qrant müsabiqəsinin 2026-cı il üzrə qalibi Pərviz Səmədovun layihə rəhbəri olduğu təşəbbüs çərçivəsində Ağcabədi rayonunda ilk görüş təşkil olunub.
Bayraq Muzeyində keçirilən tədbirdə 16–29 yaş aralığında gənclər iştirak ediblər. Görüş zamanı aktiv vətəndaşlıq, könüllülük, rəqəmsal təhlükəsizlik, süni intellektdən təhlükəsiz istifadə, inklüzivlik, sosial məsuliyyət, yaşıl gələcək və sağlam həyat tərzi mövzularında müzakirələr aparılıb.
Panel görüşdə "ASAN xidmət"in "ASAN müraciət" ilə iş sektorunun əməkdaşı Vüsal Həsənov, Gənclər üçün Təhsil Mərkəzinin Qarabağ ofisinin rəhbəri Radə Qafarova, Qarabağ Regional Gənclər və İdman İdarəsinin Ağcabədi rayonu üzrə Gənclər və İdman sektorunun əməkdaşı Eldəniz Qənbərli, Ağcabədi regional “ASAN xidmət” mərkəzinin İT əməkdaşı Vasif Əbdüləzimov və DOST İnklüziv İnkişaf və Yaradıcılıq Mərkəzinin Qarabağ “DOST Evi” şöbəsinin təlimçisi İbrahim Eyyublu çıxış ediblər.
Panel iştirakçıları müvafiq sahələr üzrə bilik və təcrübələrini gənclərlə bölüşüb, onların suallarını cavablandırıb və müzakirələr aparıblar.
Tədbir çərçivəsində yaradılan “ASAN Müraciət” guşəsində iştirakçılar informasiya sisteminin imkanları və müraciət mexanizmi ilə tanış olublar.
Layihənin əsas məqsədi gənclərin aktiv vətəndaşlıq, ictimai iştirakçılıq, rəqəmsal təhlükəsizlik, süni intellekt savadlılığı, inklüzivlik, ekoloji məsuliyyət və könüllülük istiqamətlərində bilik və bacarıqlarının artırılmasına töhfə verməkdir.
Ən son xəbərləri səhifəmizdən də izləyin
