Sabirabadda şəhid Eltun Mirzəyevin xatirəsi anılıb

Vətən müharibəsi şəhidi Mirzəyev Eltun Vüqar oğluna həsr olunmuş anım tədbiri keçirilib.

Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Anım mərasimində şəhid Eltun Mirzəyevin həyat və döyüş yolu, Vətən uğrunda göstərdiyi şücaət və qəhrəmanlıqdan bəhs olunub. Onun fədakarlığı, mərdliyi və Vətənə sədaqəti gənc nəsil üçün örnək kimi dəyərləndirilib.

Tədbirdə Sabirabad “Gənclər evi” sosial xidmət müəssisəsinin direktoru Rəşad Qurbanov çıxış edərək şəhid Eltun Mirzəyevin qəhrəmanlıq yolundan, Vətənə bağlılığından və şəhidlərimizin xatirəsinin daim uca tutulmasının vacibliyindən danışıb.

Həmçinin şəhidin anası Mirzəyeva Gülşən İbrahim qızı çıxış edərək Eltunla bağlı xatirələrini bölüşüb, onun həyatından, xarakterindən və ailəsi üçün əziz olan anlarından söz açıblar. Ailə üzvlərinin çıxışları tədbir iştirakçıları tərəfindən böyük həssaslıqla qarşılanıb.

Qeyd edək ki, Sabirabad rayonundan olan qəhrəmanımız Vətən müharibəsində göstərdiyi igidlik və fədakarlıqla xalqımızın yaddaşında əbədi yer alıb.

Şəhidlərimizin xatirəsini yaşatmaq, onların qəhrəmanlıq tarixini gələcək nəsillərə çatdırmaq hər birimizin mənəvi borcudur.

Allah bütün şəhidlərimizə rəhmət eləsin! Ruhları şad, məkanları cənnət olsun!