https://innews.az/uploads/news/2026-11/_innews_64823ec86dd6cc8224345e98e_o.jpg
9 – 12 noyabr 2026-cı il tarixlərində Portuqaliyanın paytaxtı Lissabon şəhərində dünyanın aparıcı texnologiya tədbirlərindən biri olan “Web Summit 2026” keçirilib. Azərbaycan ilk dəfə olaraq bu mötəbər sammitdə milli pavilyon səviyyəsində təmsil olunub. Pavilyonda ölkənin innovasiya ekosistemi, yerli texnologiya şirkətlərinin məhsul və həlləri nümayiş etdirilib, eləcə də Azərbaycan texnoparklarında şirkətlər üçün yaradılan yeni imkanlar haqqında məlumat verilib.
Belə ki, milli pavilyonda “AzInTelecom”, “Azercosmos”, “Polygraf AI”, “Simbrella”, “Azsoftware / Imzala.az”, “R.I.S.K. Company” və digər şirkətlər maliyyə texnologiyaları, rəqəmsal identifikasiya, bulud xidmətləri, elektron imza, süni intellekt təhlükəsizliyi, peyk texnologiyaları və kosmik xidmətlər, kibertəhlükəsizlik, rəqəmsal sənəd dövriyyəsi və rəqəmsal kreditləşmə sahələrində məhsul və innovativ həllərini beynəlxalq auditoriyaya təqdim ediblər.
Sammit çərçivəsində müxtəlif ölkələrdən olan texnologiya şirkətlərinin, startapların, investorların və rəsmi qurumların nümayəndələri ilə görüşlər keçirilib. Görüşlərdə Azərbaycanın texnologiya şirkətlərinin beynəlxalq bazarlara çıxışı, investisiya, xarici şirkətlərin Azərbaycan texnoparklarında üzvlüyü, biznes tərəfdaşlıqlarının qurulması, eləcə də innovasiya sahəsində əməkdaşlıq imkanları müzakirə olunub. Həmçinin Azərbaycanda təsdiqlənmiş yeni texnopark və vençur qanunvericiliyi çərçivəsində startapların maliyyə əlçatanlığı və texnopark rezidentliyinin üstünlükləri diqqətə çatdırılıb.
Bundan əlavə, “Web Summit 2026” zamanı Azərbaycanın texnoloji icmasının nümayəndələri ilə növbəti “Innovation Wednesdays” görüşü baş tutub. Görüşdə Portuqaliyada fəaliyyət göstərən azərbaycanlı texnologiya mütəxəssisləri, startap təsisçiləri, investorlar, həmçinin qlobal ekosistemin oyunçuları bir araya gəlib. Beynəlxalq təcrübə mübadiləsi, peşəkar əlaqələrin genişləndirilməsi və Azərbaycanın innovasiya ekosistemi ilə xaricdəki texnologiya icması arasında əməkdaşlığın gücləndirilməsi məsələləri müzakirə edilib.
Qeyd edək ki, “Web Summit” dünyanın ən böyük beynəlxalq texnologiya və innovasiya tədbirlərindən biridir. Hər il on minlərlə iştirakçını bir platformada toplayan sammit ərzində müxtəlif ölkələrdən aparıcı texnologiya şirkətləri, startaplar, investorlar, dövlət qurumlarının nümayəndələri və sahə üzrə ekspertlər iştirak edir. Tədbir çərçivəsində süni intellekt, rəqəmsal transformasiya, maliyyə texnologiyaları, kibertəhlükəsizlik və digər aktual istiqamətlər üzrə panel müzakirələri, təqdimatlar, sərgilər və işgüzar görüşlər təşkil olunur. “Web Summit” innovativ məhsulların beynəlxalq auditoriyaya təqdim edilməsi, investisiyaların cəlb olunması və qlobal texnologiya ekosistemində yeni əməkdaşlıqların qurulması üçün mühüm platforma hesab edilir.
Ən son xəbərləri səhifəmizdən də izləyin