https://innews.az/uploads/news/2026-11/_innews_c02a401ddff1271cd8d5295f5_o.jpg
Rəqəmsal bacarıqların inkişaf etdirilməsi, süni intellekt texnologiyalarından effektiv istifadənin təşviqi və beynəlxalq onlayn əmək bazarında iştirak imkanlarının genişləndirilməsi məqsədilə həyata keçirilən “Süni İntellektlə Əlavə Gəlir Bacarıqları” layihəsi çərçivəsində 14-15 noyabr 2026-cı il tarixlərində Bakı şəhərində təlim proqramı təşkil olunub.
Layihə Azərbaycan Respublikasının Gənclər Fondunun Gənclər Təşkilatları və Gənclər üçün İnkişaf, İnnovasiya və Sosial Təşəbbüslər üzrə qrant müsabiqəsi çərçivəsində həyata keçirilib.
Nərgiz Zeynalovanın təşkilatçılığı ilə keçirilən layihənin məkan tərəfdaşı iSchool olub.
Layihənin əsas məqsədi iştirakçıların süni intellekt sahəsində bilik və bacarıqlarını artırmaq, müasir rəqəmsal alətlərdən düzgün və effektiv istifadə imkanlarını tanıtmaq, həmçinin bu bacarıqları əlavə gəlir əldə etmək və peşəkar inkişaf üçün real imkanlara çevirmələrinə dəstək olmaqdır.
Layihə xüsusilə işsiz və iş axtaran şəxsləri, eləcə də karyerasına yeni başlayan və əmək bazarında yeni imkanlar axtaran şəxsləri hədəfləyib. Təşəbbüsün əsas istiqamətlərindən biri iştirakçıların rəqəmsal bacarıqlarını inkişaf etdirmək, onların özünüməşğulluq və frilans fəaliyyət imkanları haqqında məlumatlılığını artırmaqdır.
Layihə çərçivəsində iştirakçıların həm şəxsi və peşəkar inkişaflarında süni intellekt texnologiyalarından faydalanmaları, həm də beynəlxalq frilans platformalarda iş imkanları əldə etmələri hədəflənib.
Təlim iki əsas istiqamət üzrə təşkil olunub:
1. Süni intellekt və onun imkanları
Təlimin bu istiqaməti üzrə təlimçilər qismində Vüsal Mürsalzadə və Nihad Məmmədzadə çıxış ediblər. İştirakçılara süni intellektin mahiyyəti, iş prinsipləri, gündəlik həyatda və peşəkar fəaliyyətdə tətbiq imkanları haqqında məlumat verilib. Süni intellekt alətlərindən effektiv istifadə qaydaları, az bilinən funksiyalar, düzgün sorğuların (promptların) hazırlanması və texnologiyadan istifadə zamanı diqqət edilməli məqamlar müzakirə olunub.
2. Frilans fəaliyyət və onlayn iş imkanları
Təlimin bu istiqaməti üzrə təlimçi qismində Aişə Zeynallı çıxış edib. İştirakçılar Upwork və digər beynəlxalq frilans platformaları ilə tanış olublar. Platformalarda profilin yaradılması və optimallaşdırılması, layihələrə müraciət qaydaları, ilk müştərinin tapılması və rəqəmsal bacarıqlar vasitəsilə onlayn gəlir əldə etmək imkanları haqqında praktiki biliklər əldə ediblər.
“Süni İntellektlə Əlavə Gəlir Bacarıqları” layihəsi nəticəsində 50 iştirakçının süni intellekt texnologiyaları və onların praktik tətbiqi haqqında məlumatlılığının artırılmasına, rəqəmsal bacarıqlarının inkişafına və beynəlxalq frilans platformalarında fəaliyyətə başlamaq üçün ilkin biliklər əldə etmələrinə şərait yaradılıb.
Təlim iştirakçıları süni intellekt alətlərindən istifadə, onlayn iş imkanlarının araşdırılması, frilans platformalarında fəaliyyətə başlama və rəqəmsal bacarıqların gəlir mənbəyinə çevrilməsi istiqamətində praktiki biliklər əldə ediblər.
Proqramın sonunda təlimi uğurla tamamlayan iştirakçılara sertifikatlar təqdim olunub.
“Süni İntellektlə Əlavə Gəlir Bacarıqları” layihəsi işsiz və iş axtaran, eləcə də karyerasında yeni istiqamətlərə yönəlmək və əlavə gəlir imkanları əldə etmək istəyən şəxslərin müasir əmək bazarının tələblərinə uyğunlaşmasına, rəqəmsal imkanlardan daha səmərəli yararlanmasına, əlavə gəlir mənbələri formalaşdırmasına və yeni karyera perspektivləri qazanmasına töhfə verməyi hədəfləyir.







Ən son xəbərləri səhifəmizdən də izləyin