logo
Vyetnam səfəri: Azərbaycan yeni tərəfdaşlıq platformaları formalaşdırır

Vyetnam səfəri: Azərbaycan yeni tərəfdaşlıq platformaları formalaşdırır

Vyetnam səfəri: Azərbaycan yeni tərəfdaşlıq platformaları formalaşdırır Vyetnam səfəri: Azərbaycan yeni tərəfdaşlıq platformaları formalaşdırır

Prezident İlham Əliyevin Vyetnama səfəri iki ölkə arasında uzun illər ərzində formalaşmış dostluq münasibətlərinin yeni geosiyasi və iqtisadi reallıqlar fonunda daha da möhkəmləndirilməsi baxımından mühüm siyasi hadisədir. Bu səfər təkcə diplomatik təmasların genişləndirilməsi deyil, həm də onilliklər əvvəl əsası qoyulmuş qarşılıqlı hörmət, etimad və həmrəyliyə söykənən münasibətlərin müasir dövrün çağırışlarına uyğun yeni məzmunla zənginləşdirilməsidir. Prezident İlham Əliyevin Vyetnama səfərinin başlıca siyasi mesajı ondan ibarətdir ki, Azərbaycan özünün ənənəvi dostluq münasibətlərini müasir dövrün iqtisadi və geosiyasi imkanları ilə uzlaşdıraraq yeni tərəfdaşlıq platformaları formalaşdırır. Cənubi Qafqazın mühüm nəqliyyat və enerji qovşağı olan Azərbaycanla Cənub-Şərqi Asiyanın dinamik inkişaf edən ölkəsi Vyetnam arasında əməkdaşlığın dərinləşməsi hər iki dövlətin regional və beynəlxalq iqtisadi mövqelərinin güclənməsinə xidmət edir.

Bu sözləri "innews media" açıqlamasında Bakı Dövlət Universitetinin kafedra müdiri professor Kamilə Əliyeva söyləyib. O bildirib ki, Azərbaycan–Vyetnam əlaqələrinin tarixi kifayət qədər dərin köklərə malikdir. 1959-cu ildə Vyetnam xalqının görkəmli lideri Ho Şi Minin Bakıya səfəri ilə yeni mərhələyə qədəm qoyan dostluq münasibətləri sonrakı illərdə daha da inkişaf edib. 1981-ci ildə Vyetnam Kommunist Partiyası Mərkəzi Komitəsinin Baş katibi Le Zuanın Bakıya səfəri, 1983-cü ildə isə Heydər Əliyevin Vyetnama rəsmi səfəri bu münasibətlərin möhkəm siyasi və mənəvi təməlini formalaşdırıb. Həmin dövrdə Azərbaycan mütəxəssislərinin Vyetnamın neft-qaz sənayesinin qurulmasında və inkişafında iştirakı, minlərlə vyetnamlı gəncin Bakının ali təhsil müəssisələrində təhsil alması iki xalq arasında xüsusi etimad mühiti yaradıb. Bu gün də həmin məzunlar Azərbaycanla Vyetnam arasında canlı dostluq körpüsü rolunu oynayırlar.

“Prezident İlham Əliyevin 2014-cü ildə Vyetnama ilk dövlət səfəri həmin siyasi kursun davamı olmaqla ikitərəfli münasibətlər üçün yeni əməkdaşlıq perspektivləri açıb.

Münasibətlərin inkişafında növbəti tarixi mərhələ 2025-ci ilin mayında Vyetnam Kommunist Partiyasının Baş katibi To Lamın Azərbaycana dövlət səfəri zamanı Strateji tərəfdaşlığın qurulması haqqında Birgə Bəyanatın qəbul edilməsi olub. Bu sənəd Bakı ilə Hanoy arasında əlaqələrin keyfiyyətcə yeni mərhələyə yüksəldiyini təsdiqləyir. Eyni zamanda, 2025-ci ilin iyulunda Hanoyda Hökumətlərarası Komissiyanın üçüncü və Birgə Biznes Şurasının birinci iclasının keçirilməsi strateji tərəfdaşlığın konkret iqtisadi nəticələrə çevrilməsi istiqamətində mühüm addımdır.

İkitərəfli münasibətlərin prioritetlərindən biri iqtisadi və enerji əməkdaşlığıdır. 2025-ci ildə ticarət dövriyyəsinin 150 milyon dolları ötərək artım nümayiş etdirməsi müsbət göstəricidir. Bununla belə, hər iki ölkənin iqtisadi potensialı mövcud rəqəmlərdən daha geniş əməkdaşlıq imkanları yaradır. Xüsusilə SOCAR və Vyetnamın “PetroVietnam” şirkəti arasında imzalanmış Anlaşma Memorandumu neft-qaz kəşfiyyatı, enerji layihələri və kadr hazırlığı sahələrində yeni perspektivlər açır. Azərbaycan uzun illər ərzində formalaşdırdığı enerji təcrübəsini Vyetnamla bölüşməklə yanaşı, birgə investisiya və istehsal layihələrinin həyata keçirilməsində də maraqlıdır.

Qlobal enerji keçidinin sürətləndiyi bir dövrdə əməkdaşlığın yalnız ənənəvi enerji resursları ilə məhdudlaşmaması xüsusi əhəmiyyət daşıyır. Günəş və külək enerjisi, yaşıl texnologiyalar, enerji səmərəliliyi və dayanıqlı infrastruktur sahələrində birgə fəaliyyət üçün geniş imkanlar mövcuddur. Vyetnam şirkətlərinin Azərbaycanın tikinti, daşınmaz əmlak, turizm və bərpaolunan enerji bazarına marağı da iqtisadi tərəfdaşlığın şaxələndirilməsi baxımından diqqətəlayiqdir”, - deyə K.Əliyeva vurğulayıb.

Professor əlavə edib ki, nəqliyyat və logistika sahəsi də mühüm istiqamətlər sırasındadır. Azərbaycanın əlverişli coğrafi mövqeyi, Orta Dəhliz və Şimal–Cənub nəqliyyat marşrutları Cənub-Şərqi Asiya ilə Avropa arasında iqtisadi əlaqələrin genişləndirilməsi üçün yeni imkanlar yaradır. Vyetnam şirkətləri Azərbaycanı Avrasiya bazarlarına çıxış üçün etibarlı tranzit məkanı kimi nəzərdən keçirə bilərlər. Bu baxımdan tranzit daşımalarında müşahidə olunan artım əməkdaşlığın real iqtisadi potensialını nümayiş etdirir. Birbaşa aviareyslərin açılması məsələsi də turizm, biznes və insanlararası təmasların inkişafına əlavə təkan verə bilər.

Azərbaycan–Vyetnam münasibətlərinin mühüm xüsusiyyətlərindən biri də onların yalnız siyasi və iqtisadi maraqlara deyil, həm də zəngin humanitar ənənələrə əsaslanmasıdır. Heydər Əliyev Fondunun Vyetnamda təhsil və sosial sahələrdə həyata keçirdiyi təşəbbüslər, tələbə mübadiləsi, mədəniyyət günləri, elmi və yaradıcı əlaqələr bu dostluğun mənəvi əsaslarını gücləndirir. Xüsusilə Azərbaycanın neft sənayesində təhsil almış vyetnamlı mütəxəssislərin ölkələrinin inkişafında iştirakı iki xalq arasında münasibətlərin nə qədər dərin və davamlı olduğunu göstərir.

footer
Top

Ən son xəbərləri səhifəmizdən də izləyin

innews media