https://innews.az/uploads/news/2023-04/_innews_5a62847f2fe3c40e80a813012_o.jpg
Milli Məclisin vitse-spikeri Adil Əliyevin rəhbərlik etdiyi, millət vəkili Ziyafət Əsgərov, qeyri-hökumət təşkilatlarının nümayəndələri, ictimai xadimlərdən ibarət Azərbaycan heyəti, Azərbaycanın Türkiyədəki səfiri Rəşad Məmmədov və Səfirlik kollektivinin iştirakı ilə 6 fevralda Türkiyədə baş vermiş dəhşətli zəlzələdən ən çox zərər çəkən vilayətlərdən biri olan Kahramanmaraşa səfər edib.
Azərbaycan tərəfindən Kahranmaraşda qurulan çadır şəhərciklərinə baş çəkən heyəti vali Ömər Faruk Coşqun müşayiət edib.
Azərbaycan heyəti çadırları gəzərək sakinləri qarşıdan gələn Ramazan bayramı münasibətilə təbrik ediblər, onlara bayram sovqatı təqdim ediblər.
Sakinlər qarşısında çıxış edən vitse-spiker Adil Əliyev, millət vəkili Ziyafət Əsgərov, səfir Rəşad Məmmədov, Azərbaycan Respublikasının xalq artisti Azərin və digər natiqlər Azərbaycan və Türkiyənin xoş günlərdə olduğu kimi çətin zamanlarda da bir-birinin yanında olduğuna diqqət çəkərək, zəlzələnin ilk saatlarından etibarən Prezident İlham Əliyevin təlimatı ilə Azərbaycanın bütün dövlət qurumlarının Türkiyəyə yardım üçün səfərbər olduğunu qeyd ediblər.
Çıxışlarda zəlzələnin dağıdıcı nəticələrinin aradan qaldırılması üçün Azərbaycanın Türkiyə ilə əməkdaşlığa davam edəcəyi, çətinliklərin öhdəsindən bərabər gəlinəcəyi vurğulanıb.
Zəlzələdən zərər çəkən sakinlər qardaş Azərbaycanın dəstəyinin onlar üçün dəyərli olduğunu ifadə edərək, Azərbaycan dövlətinə və xalqına təşəkkürlərini çatdırıblar.
Ziyarətin sonunda xalq artisti Azərin Türkiyədə də çox sevilən “Çırpınırdın Qara dəniz” mahnısını səsləndirib.
