https://innews.az/uploads/news/2024-02/_innews_b93cac7dafc6d8e6dfab4d416_o.jpg
"Sabirabad Gənclər evi"nin fəaliyyət istiqamətlərindən biri də kənd bölgələrində təhsil alan gənclərin cəmiyyətə inteqrasiyası prosesində aktiv iştirak etməkdir. Bu məqsədlə "Sabirabad Gənclər evi"nin təşkilatçılığı ilə "Kənd Gənclərinin İnkişaf Proqramı" layihəsinin icrasına başlanıb.
Layihə çərçivəsində Kovlar kənd M. Tağıyev adına tam orta məktəbdə keçirilən görüşdə ilkin olaraq gənclərə "Sabirabad Gənclər evi"nin fəaliyyət istiqamətləri haqqında məlumatlar verilib.
Keçirilən təlimlər zamanı gənclərə ixtisas seçimi zamanı hansı kriteriyaları bilməyin faydalı olacağı, bir çox görkəmli şəxsiyyətlərin qazandığı nəticələrin onların etdiyi düzgün seçimdən asılı olması, parlaq gələcək, uğurlu karyera və doğru ixtisasa yönəlməkdə istək və bacarıqların düzgün istiqamətləndirilməsinin əhəmiyyəti barədə nəzəriyyə və təcrübəyə əsaslanaraq geniş məlumat verilib və müxtəlif rol oyunları vasitəsilə bəzi peşələr simuliyasiya olunub.
Layihə çərçivəsində keçirilən İntellektual yarışda gənclər öz biliklərini yoxlayıblar. Qalib komandalara sertifikat və mükafatlar təqdim edilib. Eyni zamanda xarici dil bacarıqlarının inkişaf etdirilməsi ilə bağlı "Yeni dil biliklərinin öyrənilməsinin vacibliyi" təlimində yeniyetmələrlə maraqlı söhbət aparılıb, effektiv xarici dil öyrənmə metodları barədə müzakirələr edilib.
"Sabirabad Gənclər evi" tərəfindən keçirilən "Kənd Gənclərinin İnkişaf Proqramı" layihəsinin gənclər arasında böyük bir maraqla qarşılanması və regionlardakı gəncliyin inkişafı baxımından faydalı töhvələr verməsi səbəbi ilə davamlı şəkildə icrası nəzərdə tutulur.
Ən son xəbərləri səhifəmizdən də izləyin
