https://innews.az/uploads/news/2024-05/_innews_e32a7a9b4c1937f255f93ed96_o.jpg
Azərbaycanın müstəqilliyinin 106-cı ildönümü ilə əlaqədar Meksikada rəsmi qəbul təşkil olunub.
Tədbirdə Meksika Xarici Əlaqələr Nazirliyinin nümayəndələri, Milli Konqresin, Senatın və digər hökumət üzvləri, Meksikada akkreditə olunmuş diplomatik korpus nümayəndələri, habelə yerli medianın, işgüzar və elmi dairələrin, o cümlədən gənclər təşkilatlarının təmsilçiləri və bu ölkədə yaşayan həmvətənlərimiz iştirak edib.
Tədbirdə çıxış edən səfir Məmməd Talıbov qonaqlara 106 il öncə Şərqdə ilk dünyəvi və parlamentli respublika olan Azərbaycan Xalq Cümhuriyyətini qurulduğunu xatırladaraq bu gün Azərbaycanın müstəqil və suveren dövlət kimi davamlı uğurunun növbəti ildönümünün qeyd olunduğunu diqqətə çatdırıb. Bütün ərazilərimiz üzərində suverenliyimizi bərpa etdikdən və Azərbaycan xalqının 30 il ərzində əziyyət çəkdiyi hərbi təcavüz və separatizmin tam məğlubiyyətindən sonra ilk dəfə müstəqilliyimizi qeyd etdiyimizi vurğulayıb.
O, Azərbaycanın bu illər ərzində gözəçarpan sosial-iqtisadi inkişaf nümayiş etdirdiyini, məcburi köçkünlərin öz yurdlarına ləyaqətlə və təhlükəsiz şəkildə qayıtmasını təmin etmək məqsədilə işğaldan azad edilmiş ərazilərini bərpa etmək çətinliyi qarşısında bu yolu uğurla davam etdirdiyini bildirib. Bu xüsusda, Azərbaycan tərəfindən aparılan yenidənqurma və bərpa işləri barədə qonaqları məlumatlandıran səfir ölkəmizin bu torpaqları yenidən çiçəklənən gözəl sülh və sabitlik diyarına çevirmək əzminindən bəhs edib. Eyni zamanda, o Azərbaycanın işğaldan azad edilmiş ərazilərdə əziyyət çəkdiyi mövcud mina təhlükəsinə toxunaraq beynəlxalq ictimaiyyəti və dostlarımızı bu problemlə üzləşmək üçün ölkəmizə siyasi, texniki və maliyyə dəstəyi verməyə çağırıb.
Çıxışında, həmçinin bu gün regionda yaranmış beynəlxalq hüquq, ölkələrin suverenliyi və ərazi bütövlüyü əsasında davamlı sülhə nail olmaq üçün misilsiz imkanlardan söz açan diplomat Ermənistan və Azərbaycan nümayəndə heyətləri arasında vasitəçisiz son ikitərəfli danışıqların uğurundan danışıb və həmin danışıqlar əsasında iki ölkə arasında sərhədlərin delimitasiya və demarkasiya prosesinə başlandığını qeyd edib.
Azərbaycanın məsuliyyətli tərəfdaş və beynəlxalq birliyin fəal üzvü kimi roluna toxunan səfir ölkəmizin ev sahibliyi etdiyi mötəbər tədbirlər, bu xüsusda ölkəmiz tərəfindən irəli sürülən təşəbbüslər barədə qonaqları məlumatlandırıb. Bu gün bir daha beynəlxalq ictimaiyyət tərəfindən ölkəmizin artan rolunun sübutu kimi bütün ölkələrin yekdil dəstəyi ilə ölkəmizin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29- a ev sahibi seçilməsini məmnunluqla xatırladıb. Bunun bəşəriyyətin ən mühüm problemlərdən biri olan iqlim dəyişikliyi ilə bağlı milli, regional və qlobal səviyyədə mübarizə səylərində Azərbaycanın liderliyinin bariz nümunəsi olduğunu bildirib.
Azərbaycan yaşıl inkişafı əsas inkişaf prioritetinə çevirdiyini bildirən diplomat 2024-cü ilin “Yaşıl Dünya üçün Həmrəylik İli” elan edildiyini, bu gün Azərbaycanın yaşıl enerjiyə keçiddə regional lider olduğunu, son illərdə ölkə daxilində yaşıl layihələrə üstünlük verildiyini qeyd edib. Bu xüsusda, iqlim dəyişikliyi kimi mühüm məsələ ilə bağlı Meksika ilə əməkdaşlığa, o cümlədən problemin ölkələrimiz üçün aktuallığını nəzərə alaraq bu istiqamətdə birgə işləməyə hazır olduğumuzu vurğulayıb.
Həmçinin, çıxışında Azərbaycan ilə Meksika arasında münasibətlərə toxunan səfir əlaqələrin həm ikitərəfli, həm də çoxtərəfli müstəvidə, o cümlədən beynəlxalq təşkilatlar və forumlar çərçivəsində müsbət dinamika ilə davam etdiyini bildirib. Bu xüsusda, son illərdə hər iki istiqamətdə həyata keçirilən səfərlərin əhəmiyyəti vurğulanıb, müxtəlif istiqamətlərdə əməkdaşlıq etmək üçün keçirilmiş səmərəli görüşlər məmnunluqla qeyd olunub.
Daha sonra tədbirdə Meksika xarici işlər naziri Alisiya Barsena adından çıxış edən Xarici Əlaqələr Nazirliyinin departament müdiri Xorxe Raskon ilk öncə təmsil etdiyi nazirliyin rəhbər heyətinin salamlarını və təbriklərini çatdırıb.
Meksikanın ölkəmizlə münasibətlərininin tarixindən söz açan X.Raskon Ulu Öndər Heydər Əliyevin 1982-ci ildə Meksikaya səfərini məmnunluqla xatırladıb, onun müasir Azərbaycanın inkişafında, o cümlədən Meksika ilə münasibətlərin əsasının qoyulmasında əvəzsiz rolundan bəhs edib.
Meksika ilə Azərbaycan arasında coğrafi məsafənin olmasına baxmayaraq, ölkələrimiz arasında müxtəlif sahələrdə yaxınlıqların və oxşarlıqların olduğun xatırladan X.Raskon hər iki ölkədə mövcud səfirliklərin əvəzsiz fəaliyyəti nəticəsində bu gün iki ölkənin daha da yaxınlaşdığını, dostluq əlaqələrinin müsbət perspektivə malik uğurlu yol tutduğunu məmnuniyyətlə qeyd edib.
Tədbir çərçivəsində qonaqlara COP29 loqosu və ölkəmizin turizm imkanlarından bəhs edən videoçarxlar nümayiş olunub, milli mətbəx nümunələri təqdim edilib.
