https://innews.az/uploads/news/2024-10/_innews_8070beefe1bfa8f6b896b8a33_o.jpg
27-29 sentyabr 2024-cü il tarixlərində Perunun Lima şəhərinin ən tanınmış olan Miraflores rayonunda Beynəlxalq Mədəniyyət, Turizm və Təhsil Sərgisi keçirilib. Tədbirdə otuzdan çox ölkənin səfirlikləri, eləcə də təhsil və mədəniyyət mərkəzləri iştirak ediblər. Sərgidə Azərbaycanın zəngin mədəniyyəti və turizm potensialı nümayiş etdirilib.
Sərginin açılış mərasimi Ümumdünya Turizm Günü çərçivəsində keçirilib və tədbirdə Perunun xarici ticarət və turizm naziri, inkişaf və sosial inteqrasiya naziri, Miraflores rayonunun bələdiyyə başçısı, eləcə də diplomatik korpusun nümayəndələri iştirak ediblər.
Azərbaycanın stendi sərgi boyunca böyük maraqla qarşılanıb. Burada ölkəmiz haqqında, həmçinin Formula 1 Qran Prisi və noyabr ayında keçiriləcək COP29 kimi mühüm beynəlxalq tədbirlər haqqında məlumat təqdim olunub. Azərbaycanın turistik məkanları, ölkəmizin turizm potensialı, Qız qalası, Şuşa qalası və digər mühüm tarixi abidələr haqqında məlumatlar verildi. Milli məhsullar, o cümlədən Azərbaycan çayı, şərabları və xalçaçılıq sənəti nümunələri də ziyarətçilərə təqdim edildi.
Üç gün ərzində sərgiyə 60,000-dən çox qonaq qatıldı, onların çoxsaylı suallarına cavab verildi, müxtəlif materiallar paylanıldı.
Sərgi yerli media tərəfindən geniş şəkildə işıqlandırıldı.
