https://innews.az/uploads/news/2024-12/_innews_8d6f27bf51b8ccd3c569d5788_o.jpg
İnnovasiya və Rəqəmsal İnkişaf Agentliyi (İRİA) Almaniyanın "Constructor University Bremen" ilə birgə əməkdaşlıq çərçivəsində rəqəmsal bacarıqların inkişafına yönəlmiş “Rəqəmsal Bacarıqların Proqnozlaşdırılması” adlı tədqiqat layihəsi həyata keçirib. Layihə çərçivəsində oktyabr-noyabr aylarını əhatə edən strateji proqnozlaşdırma sessiyaları baş tutub.
Dövlət qurumları və agentlikləri, aparıcı universitetlər, peşə təhsil müəssisələrindən olan ekspert qrupu rəqəmsal bacarıqların inkişafı üçün problemləri araşdıraraq mövcud imkan və trendləri birgə müəyyən ediblər. Sessiyalarda həmçinin Beynəlxalq Əmək Təşkilatı tərəfindən hazırlanmış “Skills Foresight” metodologiyasından istifadə edilib. Bu yanaşma maraqlı tərəflərə tendensiyaları cəld təhlil etməyə, bacarıqlardakı boşluqları dəqiqləşdirməyə və uzunmüddətlistrategiyalar təklif etməyə imkan verir.
Sözügedən sessiyalar zamanı təklif olunan tövsiyələrdən biri də İT ilə əlaqəli təhsil proqramlarının paylanmış sisteminin (“şəbəkə universiteti”) yaradılması olub. Belə bir sistem vasitəsilə mövcud yerli universitetlər ilə telekommunikasiya və bank sektorunun böyük şirkətləri arasında tərəfdaşlıq yaradılması üçün istifadə oluna bilər. Təklif edilən bu model rəqəmsal məhsuların inkişafı, kibertəhlükəsizlik və məlumat analitikası da daxil olmaqla ən çox tələb olunan bacarıqlara diqqət yetirəcək.
Sessiyaların nəticələri qlobal tendensiyaların və Azərbaycan əmək bazarının kəmiyyət analitikası ilə birləşdirilərək milli səviyyədə rəqəmsal bacarıqların keyfiyyətinin yüksəldilməsi üçün siyasət tövsiyələrinin əsasını təşkil edəcəkdir.
Qeyd edək ki, sözügedən layihənin məqsədi rəqəmsal bacarıqlardakı boşluqları aradan qaldırmaq və işçi qüvvəsini sürətlə rəqəmsallaşan iqtisadiyyatın tələbləri ilə uyğunlaşdırmaqdır.
