https://innews.az/uploads/news/2024-12/_innews_09307655ea8340996905427cb_o.jpg
17 dekabr tarixində İnnovasiya və Rəqəmsal İnkişaf Agentliyi (İRİA) şirkətlərin insan resursları sahəsində fəaliyyət göstərən nümayəndələri ilə görüş keçirib. Görüşdə işə qəbul proseslərində rəqəmsal xidmətlərin tətbiqi və bu istiqamətdə mövcud imkanlar müzakirə olunub. Xüsusilə "mygov" rəqəmsal hökumət platforması və SİMA rəqəmsal imzanın istifadəsi diqqət mərkəzində olub. İşə qəbul zamanı tələb olunan bir sıra sənədlərin tam rəqəmsal qaydada "mygov" üzərindən təqdim edilmə imkanları ətraflı izah edilib. Tədbirdə insan resursları üzrə 40-dan çox nümayəndə iştirak edib.
Açılış nitqi ilə çıxış edən İRİA-nın İdarə Heyətinin sədr müavini Şahin Əliyev rəqəmsal həllərin idarəetmə proseslərində sürət və təhlükəsizlik baxımından önəmini vurğulayıb.
Təqdimat zamanı "mygov" platformasının təqdim etdiyi "Məhkumluq haqqında arayış" xidmətinin üstünlükləri barədə ətraflı məlumat verilib. Bildirilib ki, vətəndaşlar bu arayışı "mygov"a daxil olaraq "Xidmətlər" bölməsindən əldə edə bilirlər. Eyni zamanda “mygov”da işə qəbul prosesində tələb olunan bu sənədin rəqəmsal nüsxəsinin birbaşa iş yerinə göndərilməsi təmin edilir. Bununla vətəndaşlar sənədi fiziki formada iş yerinə təqdim etmək məcburiyyətində qalmırlar.
Bununla yanaşı, görüşdə rəqəmsal şəxsiyyət vəsiqəsi, təhsil məlumatlarının rəqəmsal istifadəsi və miqrasiya ilə bağlı təqdim olunan xidmətlər haqqında geniş məlumat verilib. Eyni zamanda SİMA rəqəmsal imzanın işə qəbul proseslərində tətbiqinə dair imkanlar nümayiş etdirilib.
Görüş sual-cavab sessiyası ilə yekunlaşıb. Tədbirin əsas məqsədi rəqəmsal həllərin insan resursları və işə qəbul proseslərində tətbiqini genişləndirmək və bu həllərin praktiki faydalarını nümayiş etdirmək olub.
