https://innews.az/uploads/news/2025-02/_innews_7aaf57e12960da5102834b55f_o.jpg
Son illərdə dünyada və Azərbaycanda plastik əməliyyatlara maraq sürətlə artır. Həkimlər hesab edirlər ki, bu tendensiyanın əsas səbəblərindən biri informasiyanın əlçatanlığının artması və sosial mediada gözəllik standartlarının geniş yayılmasıdır.
Bəs estetik əməliyyatlar niyə bu qədər dəbə mindi?
İnsanlarda bədənlərini dəyişdirməyə meyillilik haradan qaynaqlanır?
Bu istək psixologiya ilə hansı əlaqəyə malikdir?
Bu suallara aydınlıq gətirmək üçün tanınmış şüuraltı terapist və yaşam koçu Nərmin Hacıyeva müraciət etdik.
Nərmin Hacıyevanın fikrincə, insanların estetik əməliyyatlara üz tutmasının əsas səbəbi özlərini dəyərsiz və yetərsiz hiss etmələridir.
“İnsan daxilində "görünmürəm, sevilmirəm, dəyərsizəm, özümü qəbul edə bilmirəm" kimi şüuraltı proqramlar daşıyırsa, diqqəti öz üzərinə çəkməyə çalışır. O düşünür ki, əməliyyat olunsam daha gözəl olaram, məni görəcəklər, sevəcəklər, dəyərli hiss edəcəyəm.”
Psixoloq bildirir ki, bu kimi duyğuların kökü uşaqlıqda formalaşmış travmalara əsaslanır.
"Uşaqlıqda valideynlərindən yetərincə sevgi və diqqət görməyən insanlar, böyüdükdə bu sevgini başqalarının “tərif və diqqət qırıntılarında” axtarmağa meyilli olurlar. Özünü qəbul edə bilməmək, sosial təsdiq axtarmaq və özgüvən çatışmazlığı plastik əməliyyatlara yönəldən əsas psixoloji faktorlar sırasındadır.”
Mütəxəssis hesab edir ki, insanlar bəzən daxili problemləri həll etmək əvəzinə, fiziki görünüşlərini dəyişdirməyə çalışırlar.
“Bəli, plastik əməliyyata gedən insanların çoxunda bu psixoloji amillər var. Amma bu problemləri terapiya ilə həll etmək əvəzinə, əməliyyata yönəlirlər. Halbuki, əsas məsələ özünüdərk və daxili dəyərin fərqinə varmaqdır.”
"Canınızı riskə atmayın. Əməliyyata ehtiyacınız olub-olmadığını dərk etmək üçün əvvəlcə öz şüuraltınızı analiz edin. Həqiqi gözəlliyiniz içərinizdədir – onu başqalarının təsdiqində deyil, özünüzdə tapın.”
