https://innews.az/uploads/news/2025-04/_innews_0725bba2af40828559e92a93a_o.jpg
23 aprel 2025-ci il tarixində Azərbaycanın aparıcı beyin mərkəzi olan Beynəlxalq Münasibətlərin Təhlili Mərkəzində (BMTM) Qazaxıstan-Azərbaycan Ekspert Şurasının dördüncü iclası keçirilib.
Tədbirdə Qazaxıstanın Azərbaycandakı Səfiri Alim Bayel, BMTM-in Sədri Səfir Fərid Şəfiyev, Qazaxıstan Strateji Tədqiqatlar İnstitutunun (QSTİ) Direktoru Yerkin Tukumov, millət vəkilləri, Qazaxıstanın və Azərbaycanın aparıcı ekspertləri, habelə KİV nümayəndələri iştirak ediblər.
Çıxış zamanı Səfir A. Bayel Qazaxıstan-Azərbaycan münasibətlərinin keyfiyyətcə yeni mərhələyə keçdiyini və bunu son dövrdə Qazaxıstanın Prezidenti Kasım-Jomart Tokayevin Azərbaycana və Azərbaycanın Prezidenti İlham Əliyevin Qazaxıstana etdiyi çoxsaylı səfərlər sübut etdiyini vurğulayıb.
A. Bayel, bu il Qazaxıstanın Azərbaycanın ən böyük buğda tədarükçüsünə çevrildiyini məmnuniyyətlə bildirib. 2025-ci ilin birinci rübünün nəticələrinə görə, Azərbaycanın buğda idxalının 80%-i Qazaxıstanın payına düşüb. Bu, hər iki ölkənin aidiyyəti strukturlarının əməkdaşlığı sayəsində mümkün olub. Xüsusilə qeyd olunub ki, ötən il Qazaxıstanın Bakıdakı Səfirliyində qarşılıqlı ticarətin artırılmasına yönəlmiş kənd təsərrüfatı forumu təşkil olunub.
Diplomat onu da vurğulayıb ki, bu ilin mart ayında ikitərəfli münasibətlər tarixində ilk dəfə olaraq Bakıda Qazaxıstanın 23 universitetinin iştirakı ilə Qazaxıstanın Ali Təhsil Günləri keçirilib. İki ölkənin ali təhsil müəssisələri arasında 40 memorandum imzalanıb.
A. Bayel, həmçinin Qazaxıstanın və Azərbaycanın beynəlxalq təşkilatlar çərçivəsində səmərəli əməkdaşlığını qeyd edib. Xüsusilə bildirilib ki, Azərbaycan AQEM-də sədrliyə keçib və bu il Astanada yerləşən İslam Ərzaq Təhlükəsizliyi Təşkilatına üzv olmağa hazırlaşır. Öz növbəsində, Qazaxıstan da Bakıda yerləşən İƏT Əmək Mərkəzinə qoşulmağa hazırdır. Türk inteqrasiyası Qazaxıstan və Azərbaycan üçün prioritet istiqamətdir. Səfirin sözlərinə görə, ölkələrimiz ümumtürk əməkdaşlığının lokomotivinə çevrilib. Xəzərin hər iki sahilində yerləşən Azərbaycan və Qazaxıstan Avrasiya nəqliyyat-logistika arxitekturasında da əsas rol oynayırlar.
Fərid Şəfiyev öz çıxışında ekspert səviyyəsində mütəmadi görüşlərin və akademik mənbələrin formalaşdırılmasında birgə fəaliyyətin vacibliyini vurğulayıb. O, həmçinin ekspert şuralarının iclaslarını gələcəkdə Azərbaycan və Qazaxıstan ali təhsil müəssisələrinin iştirakı ilə birgə keçirilməsinin mümkünlüyü qeyd edib.
Yerkin Tukumov öz çıxışında son illərdə iki ölkə arasında münasibətlərin intensivləşməsi, Azərbaycanın Qazaxıstanın Cənubi Qafqazdakı əsas tərəfdaşı olduğunu qeyd edib. O, bu tərəfdaşlığın ortaq strateji baxış və qarşılıqlı dəstəyə əsaslandığı bildirib. QSTİ-nin direktoru ekspert şurasının növbəti iclaslarının Qazaxıstanın və Azərbaycanın müxtəlif şəhərlərində keçirilməsini təklif edib.
Görüş çərçivəsində enerji, nəqliyyat-logistika əməkdaşlığı, elmi-ekspert birgə fəaliyyəti, mədəni-humanitar əlaqələr və gənclər siyasəti ilə bağlı ekspertlərin fikirləri və təklifləri dinlənilib.
