https://innews.az/uploads/news/2025-10/_innews_f73ccf3840807b22a8a534b75_o.jpg
AR-nın Prezidenti İ. Əliyevin Qazaxıstana dövlət səfəri çərçivəsində Astanada QR-nın AR-dakı Səfirliyin təşəbbüsü ilə “Qazaxıstan–Azərbaycan: Süni intellektin inkişafı və sənaye təşəbbüsləri şəraitində iqtisadi əməkdaşlıq” mövzusunda biznes-forum keçirilib.
Tədbirdə hər iki ölkənin dövlət qurumlarının və işgüzar dairələrinin nümayəndələri, o cümlədən ticarət, logistika, sənaye, İT, nəqliyyat, kənd təsərrüfatı, tikinti, energetika, turizm, təhsil və digər sahələrdə fəaliyyət göstərən 100-dən çox şirkətin nümayəndələri iştirak ediblər.
Forumun açılışında QR-nın Ticarət və İnteqrasiya Nazirinin Müavini A. Abildabekov və AR-nın İqtisadiyyat Nazirinin Müavini A. Axundov salamlama nitqi ilə çıxış ediblər. Forum çərçivəsində eyni zamanda “KAZAKH INVEST” Milli Şirkətinin İdarə Heyətinin Sədri S. Kinjakulov, “QazTrade”-nin Baş Direktoru A. Aldajarov, AZPROMO – Azərbaycan İxracın və İnvestisiyaların Təşviqi Agentliyinin İcraçı Direktoru Y. Abdullayev, KOBİA – Kiçik və Orta Biznesin İnkişafı Agentliyinin Sədri O. Məmmədov, “Damu” Fondunun İdarə Heyətinin Sədri F. Sarsekeyev və digərləri çıxış ediblər.
Tədbir zamanı ticarət-iqtisadi əlaqələrin möhkəmləndirilməsi, investisiya əməkdaşlığının inkişafı, nəqliyyat-logistika infrastrukturunun təkmilləşdirilməsi, rəqəmsallaşdırma, süni intellektin tətbiqi, yüksək texnologiyalar və təhsil sahəsində birgə layihələrin yaradılması, eləcə də əməkdaşlığın digər mühüm istiqamətləri müzakirə olunub. Tədbir çərçivəsində B2B və B2C formatlarında görüşlər keçirilib.
Forum çərçivəsində həmçinin “İqtisadi əməkdaşlığın dərinləşdirilməsi və tərəfdaşlığın yeni üfüqləri” mövzusunda III Qazaxıstan–Azərbaycan Biznes Şurasının iclası təşkil edilib.
Azərbaycan tərəfindən “AZPROMO”nun İcraçı Direktoru Y. Abdullayev, “KOBİA” Agentliyinin İdarə Heyətinin Sədri O. Məmmədov və Biznes Şurasının Azərbaycan tərəfindən həmsədri E. Sadiq çıxış ediblər. Qazaxıstan tərəfini Qazaxıstanın Xarici Ticarət Palatasının İdarə Heyətinin Sədri M. Karimsakov və Biznes Şurasının Qazaxıstan tərəfindən həmsədri D. Bimov təmsil ediblər.
İclas zamanı QR-nın AR-dakı Səfiri A. Bayel Azərbaycandan və Qazaxıstandan olan 14 şirkətə ikitərəfli işgüzar əlaqələrin inkişafına verdikləri töhfəyə görə təşəkkür məktubları təqdim edib.
Ümumilikdə, tədbirlər nəticəsində Qazaxıstan və Azərbaycan nümayəndələri sənaye, turizm, təhsil, rəqəmsal texnologiyalar, logistika və digər sahələri əhatə edən 16 saziş və əməkdaşlıq memorandumları imzalayıblar. İmzalanan sənədlərdən 12-si Qazaxıstanın Azərbaycandakı Səfirliyi tərəfindən təşəbbüs olunub.
Bunların arasında “Alaköl” müalicə-sağlamlıq kompleksinin tikintisi haqqında, Almatıda müasir enerji cəhətdən effektiv işıqlandırma avadanlıqlarının istehsalı haqqında, təhsil həlləri sahəsində əməkdaşlıq haqqında, uşaq geyiminin istehsalı və satışı sahəsində əməkdaşlıq haqqında, Qazaxıstanın məktəblərin birində Heydər Əliyev adına tədris otağının yaradılması haqqında memorandumlar, həmçinin Astanada “KOB Evi” layihəsinin həyata keçirilməsi haqqında saziş yer alır.
Bundan əlavə, biznes-forumda iştirak edən Qazaxıstanın təhsil sahəsində xidmətlər göstərən “Qalan” şirkəti (şagirdlər üçün riyaziyyat üzrə onlayn tədris platforması) və Azərbaycanın “SAIRS” şirkəti (suvarma üçün suyun səviyyəsi, axını və sərfiyyatının ölçülməsi texnologiyası) öz layihələrinin təqdimatlarını Prezidentlər K. Tokayev və İ. Əliyev qarşısında nümayiş etdiriblər. Təqdimat zamanı “Qalan” şirkəti Azərbaycan təhsil sisteminə uyğunlaşdıraraq, Qarabağ ərazisində yerləşən məktəblərə təmənnasız şəkildə xidmət göstərməyə hazır olduğunu bildirib.
Astanada keçirilən işgüzar proqram və biznes-forumu ilə müşayiət olunan Azərbaycan Prezidentinin dövlət səfəri iki qardaş dövlət arasında strateji tərəfdaşlığın inkişafında mühüm mərhələ olub. Qazaxıstan Respublikasının Prezidenti Kasım-Jomart Tokayev biznes-forumun ikitərəfli münasibətlərin inkişafı üçün əhəmiyyətini xüsusi vurğulayıb. İmzalanmış sazişlər, işgüzar dairələrin iştirakı, investisiya və infrastruktur layihələrinin həyata keçirilməsi istiqamətində atılan konkret addımlar iki ölkə arasındakı əməkdaşlığın nəinki iqtisadi tərəfdaşlıq, həmçinin tarixi dostluğa əsaslanan yeni mərhələyə keçdiyini göstərir.
