https://innews.az/uploads/news/2025-11/_innews_9f8ada8ae8164d920dac78c2a_o.jpg
8 Noyabr – Zəfər Günü münasibətilə Avstraliya İttifaqının Sidney şəhərində təntənəli bayram konserti və foto sərgi keçirilib. Tədbir Azərbaycanın Avstraliya İttifaqındakı səfirliyinin və Diasporla İş üzrə Dövlət Komitəsinin birgə dəstəyi, eləcə də Avstraliya Azərbaycan Assosiasiyaları Alyansının təşkilatçılığı ilə baş tutub.
Tədbirdə diplomatik korpusun nümayəndələri, biznes və akademik dairələrin təmsilçiləri, media nümayəndələri, eləcə də Avstraliyada yaşayan Azərbaycan icmasının üzvləri və yerli milli icma rəhbərləri iştirak ediblər.
Azərbaycanın Avstraliyadakı səfirliyinin müvəqqəti işlər vəkili Dr. Vaqif Cəfərov açılış nitqində qeyd edib ki, 8 Noyabr – Zəfər Günü Azərbaycan xalqının şanlı tarixində xüsusi yer tutur. O vurğulayıb ki, “beş il əvvəl xalqımız tarixi Qələbə qazandı – bu Qələbə yalnız işğalın başa çatması deyil, milli ləyaqətimizin, qürurumuzun və ədalətin bərpası idi. Bu gün biz şəhidlərimizin müqəddəs xatirəsi qarşısında baş əyir, onların canı bahasına qazanılmış azadlığımızı qürurla qeyd edirik.”
Diplomat çıxışında əlavə edib ki, bu tarixi Zəfər Prezident İlham Əliyevin rəhbərliyi altında xalqın birliyi, əsgərlərin fədakarlığı və dövlətin gücü sayəsində əldə olunub. O, həmçinin Azərbaycanın ədalətli mübarizəsində daim yanında olan Türkiyə və Pakistan kimi qardaş ölkələrə, eləcə də ölkəmizin suverenliyinə və ərazi bütövlüyünə hörmətlə yanaşan Avstraliya hökumətinə, bütün dost dövlətlərə dərin minnətdarlığını ifadə edib.
Tədbirin bədii hissəsində Əməkdar artist Sevinc Hüseynlinin rəhbərlik etdiyi yeni yaradılmış Azərbaycan Milli Rəqs Dərnəyi və “Odlar Yurdu” qrupu, həmçinin Türk-Avstraliya soprano Ayşe Göknur Şanal, ADENA Rəqs Ansamblı və Aytay instrumental qrupu Azərbaycan musiqi və rəqs nümunələri əsasında zəngin konsert proqramı təqdim ediblər. Hər bir çıxış tamaşaçıların böyük alqışları ilə qarşılanıb.
Tədbirdə həmçinin, Avstraliya Azərbaycan Assosiasiyaları Alyansının rəhbəri Fuad Aydınbəyzadə çıxış edərək vurğulayıb ki, Avstraliyada yaşayan azərbaycanlılar ikinci vətən kimi qəbul etdikləri bu ölkənin ictimai-siyasi və mədəni həyatında daha fəal iştirak etməyə çalışırlar.
Tədbir çərçivəsində Zəfərə həsr olunmuş geniş foto sərgi nümayiş etdirilib. Sərgidə 44 günlük Vətən müharibəsi dövrünü, işğaldan azad edilmiş torpaqların yenidən qurulmasını və şəhidlərimizin qəhrəmanlığını əks etdirən nadir fotoşəkillər təqdim olunub. İştirakçılar sərgidə Azərbaycanın azadlıq mübarizəsinin simvoluna çevrilmiş anları böyük maraqla izləyiblər.
Tədbir dostluq, qürur və vətənpərvərlik ruhunda başa çatıb.
