https://innews.az/uploads/news/2026-04/_innews_36626031625fd3ceec6c18b5d_o.jpg
Aprelin 1-də Azərbaycan Dövlət Pedaqoji Universitetində (ADPU) tələbələrin ədliyyə orqanlarında qulluğa qəbul, karyera imkanları və peşə perspektivləri barədə məlumatlandırılması məqsədilə görüş keçirilib. Tədbirin əsas məqsədi gənclərin ədliyyə orqanlarında xidmət imkanları, mövcud vakansiyalar, qəbul qaydaları, eləcə də könüllü və təcrübə proqramları barədə ətraflı məlumatlandırılması olub. Görüş zamanı xüsusilə icra və probasiya məmuru vəzifələri üzrə ixtisas məhdudiyyətinin aradan qaldırılması ilə bağlı yeniliklər də iştirakçıların diqqətinə çatdırılıb.
Görüşdə ADPU-nu Sosial və humanitar məsələlər üzrə prorektor Fikrət Rzayev, rektorun müşaviri Ümid Mehdiyev, Tədbirlərin təşkili və tələbələrlə iş şöbəsinin müdiri Turan Kərimli, Ədliyyə Nazirliyinin əməkdaşları – Probasiya xidmətinin rəisi Vüqar Ağayev, Mətbuat xidmətinin rəisi Ləman Hüseynzadə, İnsan resursları idarəsinin rəisi Cahangir Hacıyev, İcra xidmətinin rəis müavini Yaqub Qurbanov, Probasiya xidmətinin şöbə rəisi Səyyad Məcidov, İcra xidmətinin qrup rəhbəri Ayaz Əlirzayev və Ədliyyə Könüllüləri Təşkilatının sədri Cavad Cavadlı və tələbələr iştiak ediblər.
Görüşün moderatoru, ADPU-nun rektor müşaviri Ümid Mehdiyev görüşün mahiyyəti və məqsədləri barədə iştirakçıları məlumatlandırıb.
Giriş sözü ilə çıxış edən ADPU-nun sosial və humanitar məsələlər üzrə prorektoru professor Fikrət Rzayev bu istiqamətdə görüşlərin tələbələrin peşə yönümünün formalaşması, dövlət qulluğu sahəsində məlumatlılığının artırılması və gələcək karyera imkanlarının genişlənməsi baxımından əhəmiyyətini vurğulayıb.
Ədliyyə Nazirliyinin nümayəndələri çıxışlarında tələbələrə ədliyyə sistemində fəaliyyət istiqamətləri, işə qəbul prosedurları, mövcud vakansiyalar, könüllü və təcrübə proqramları, eləcə də bu sahədə peşəkar inkişaf imkanları barədə geniş məlumat veriblər. Eyni zamanda, gələcəkdə keçiriləcək müsabiqələrdə iştirak imkanlarının genişləndirilməsi və tələbələrin bu proseslərə hazırlanması ilə bağlı vacib məqamlar diqqətə çatdırılıb.
Tələbələrin böyük maraq göstərdiyi görüş sual-cavab sessiyası ilə davam edib. Sessiya zamanı iştirakçıları maraqlandıran məsələlər ətrafında fikir mübadiləsi aparılıb, ədliyyə orqanlarında xidmətə qəbulun şərtləri və bu sahədə karyera qurmaq istəyən gənclər üçün yaradılan imkanlar ətraflı izah olunub.
Qeyd edək ki, bu kimi maarifləndirici görüşlər tələbələrin əmək bazarına hazırlanması, onların peşə istiqamətinin dəqiqləşdirilməsi və dövlət qulluğu sistemində mövcud imkanlarla yaxından tanış olması baxımından mühüm əhəmiyyət daşıyır.
