Komitə əməkdaşları “Natəvan” həftəsonu məktəbini ziyarət edib

Komitə əməkdaşları “Natəvan” həftəsonu məktəbini ziyarət edib Komitə əməkdaşları “Natəvan” həftəsonu məktəbini ziyarət edib https://innews.az/az/news/id-60596

Azərbaycan Respublikasının Diasporla İş üzrə Dövlət Komitəsinin əməkdaşları Fransaya səfər çərçivəsində Parisdə Fransa-Azərbaycan Dialoq Assosiasiyasının nəzdində fəaliyyət göstərən “Natəvan” Azərbaycan həftəsonu məktəbini ziyarət ediblər. Komitə əməkdaşları Azərbaycanın görkəmli şairəsi Xurşidbanu Natəvanın adını daşıyan bu təhsil ocağında dərs prosesini izləyib, tədris mühiti ilə yaxından tanış olublar.

Məktəbin kollektivi həftəsonu məktəbində təhsil üçün yaradılan əlverişli şəraitdən bəhs edib, şagirdlərin dilimizi və milli-mənəvi dəyərlərimizi böyük həvəslə öyrəndiklərini diqqətə çatdırıb,  göstərilən qayğıya görə Azərbaycan dövlətinə minnətdarlıq ifadə ediblər.

Komitə sədrinin müavini Vaqif Seyidbəyov şagirdləri səmimi salamlayaraq, dünyanın müxtəlif ölkələrində fəaliyyət göstərən həftəsonu Azərbaycan məktəblərinin xaricdə doğulub böyüyən soydaşlarımızın milli kimliyinin qorunmasında və gələcək nəsillərə ötürülməsində mühüm rol oynadığını vurğulayıb. Azərbaycan dövlətinin ana dilimizin qorunması, inkişafı və xaricdə təbliği istiqamətində həyata keçirdiyi ardıcıl siyasətin uğurlu nəticələrindən danışıb. Qeyd edib ki, Ümummilli Lider Heydər Əliyevin əsasını qoyduğu ana dilinə, milli adət-ənənələrimizə və zəngin mədəni irsimizə qayğı siyasətini bu gün Prezident İlham Əliyev uğurla davam etdirir və daha da gücləndirir. Sədr müavini Fransada böyüyən azərbaycanlı uşaqlara ana dilimizi sevərək öyrənməyi, onu gündəlik həyatlarında yaşatmağı və gələcək nəsillərə ötürməyi tövsiyə edib.

Məktəbin rəhbəri Aytən Muradova təhsil ocağının uğurlu fəaliyyətinə diqqət çəkib, Fransada yaşayan soydaşlarımızın məktəbə maraqlarının getdikcə daha da artdığını nəzərə çatdırıb.                        Sonda Azərbaycan dövləti adından həftəsonu məktəbinə hədiyyələr təqdim olunub.

Xatırladaq ki, bu gün dünyanın 24 ölkəsində 90-dan çox həftəsonu Azərbaycan məktəbi var, həmin məktəblərin böyük əksəriyyəti, o cümlədən “Natəvan” həftəsonu məktəbi Azərbaycan Respublikasının Diasporla İş üzrə Dövlət Komitəsinin dəstəyi ilə fəaliyyət göstərir. Komitə məktəblərin hər birini lazım olan vəsaitlərlə tam şəkildə təmin edir.