https://innews.az/uploads/news/2026-04/_innews_a1e66d64f75d4b4aa457da7d4_o.jpg
Nant Fransanın azərbaycanlıların kompakt yaşadığı və icmalaşma prosesinin sürətlə getdiyi şəhərlərindən biridir. Azərbaycan Respublikasının Diasporla İş üzrə Dövlət Komitəsinin əməkdaşları Nant şəhərində Azərbaycan icması ilə görüşüb.
Görüş Azərbaycan Respublikasının Dövlət himninin səsləndirilməsi, ölkəmizin ərazi bütövlüyü uğrunda canlarından keçən qəhrəman oğulların xatirəsinin ehtiramla yad edilməsi ilə başlayıb.
Diasporla İş üzrə Dövlət Komitəsi sədrinin müavini Vaqif Seyidbəyov Prezident İlham Əliyevin rəhbərliyi ilə Azərbaycanın diaspor siyasətinin daha üstün mərhələyə daşındığını diqqətə çatdırıb, Fransada, o cümlədən Nantda yaşayan soydaşlarımızın həmrəyliyini yüksək qiymətləndirib. Nəzərə çatdırılıb ki, Azərbaycan dövləti hər zaman xaricdə yaşayan soydaşlarımızın yanında olduğunu qətiyyətlə nümayiş etdirir, onların hüquqlarının qorunması, milli kimliyimizin yaşadılması və güclü diaspor şəbəkəsinin formalaşdırılması istiqamətində ardıcıl və çoxşaxəli layihələr həyata keçirir. Bu siyasət çərçivəsində müxtəlif ölkələrdə fəaliyyət göstərən icmalarımızın təşkilatlanması, bir-biri ilə əlaqələrinin möhkəmləndirilməsi və vahid mövqedən çıxış etməsi prioritet istiqamətlərdən biri kimi müəyyən olunub.
Görüşdə dünya azərbaycanlılarının fəaliyyətinin daha səmərəli şəkildə mərkəzləşdirilməsinə və mobilizasiya prosesinə xidmət edən Koordinasiya Şuraları, Azərbaycan Evləri, həftəsonu Azərbaycan məktəbləri, eləcə də xarici ölkələrdə təşkil olunan ixtisaslaşmış forumlar və digər təşəbbüslər barədə geniş və ətraflı məlumat təqdim edilib.
İcma üzvləri ilə açıq və konstruktiv fikir mübadiləsi aparılıb, onların icmalaşma prosesinin sürətləndirilməsi, fəaliyyətin daha effektiv təşkili və mövcud problemlərin aradan qaldırılması ilə bağlı çoxsaylı təklifləri dinlənilib. Səsləndirilən ideyaların gələcək fəaliyyət planlarında nəzərə alınacağı bildirilib.
Qeyd edək ki, Diasporla İş üzrə Dövlət Komitəsinin dünyanın müxtəlif ölkələrindəki Azərbaycan icmaları ilə mütəmadi görüşlərinin keçirilməsi artıq ənənə halını alıb. Bu istiqamətdə görülən işlər Azərbaycan diasporunun beynəlxalq miqyasda nüfuzunun artmasına və ölkəmizin maraqlarının daha effektiv müdafiəsinə mühüm töhfə verir.
