Daşkənddə uşaqlar üçün mədəni proqram təşkil olunub

Azərbaycanın Özbəkistandakı səfirliyi nəzdində Heydər Əliyev adına Azərbaycan Mədəniyyət Mərkəzində “Uşaq ədəbiyyatı – mədəni dialoqun təməli” layihəsi və Azərbaycan mədəniyyətinin təbliği istiqamətində həyata keçirilən tədbirlər çərçivəsində uşaqlar üçün konsert proqramı təşkil olunub.

Tədbirdə iştirak edən məktəblilər və gənc tamaşaçılar üçün təqdim olunan proqramda Azərbaycan mədəniyyətinin müxtəlif sahələrini əks etdirən rəngarəng çıxışlar nümayiş etdirilib.

Proqram çərçivəsində Mədəniyyət Mərkəzinin “Xarıbülbül” teatr truppasının üzvləri tərəfindən səhnə çıxışları təqdim olunub. Teatr kollektivi tərəfindən nümayiş etdirilən çıxışlar uşaqlarda böyük maraq doğurub və tədbirə xüsusi rəng qatıb.

Daha sonra Mərkəzin “Qarabağ Zəfəri” rəqs ansamblı tərəfindən Azərbaycan xalq rəqsləri ifa olunub. Ansamblın çıxışları tədbir iştirakçıları tərəfindən alqışlarla qarşılanıb.

Qeyd olunub ki, belə tədbirlər uşaqların mədəni zövqünün formalaşmasına, onların incəsənətə marağının artırılmasına və milli dəyərlərin təbliğinə xidmət edir.