https://innews.az/uploads/news/2026-04/_innews_0797138b7f1a7b9fa34963708_o.jpg
Latviya Prezidenti Edqar Rinkeviçin Azərbaycana səfəri ilk baxışda bir diplomatik səfər kimi görünə bilər. Lakin bu səfəri diqqətlə təhlil etdikdə aydın olur ki, söhbət yalnız iki ölkə arasında münasibətlərin inkişafından getmir. Bu daha geniş mənada dəyişən dünya düzənində yeni əməkdaşlıq modelidir. Bakıda keçirilən görüşlərdə Prezident cənab İlham Əliyev tərəfindən səsləndirilən fikirlər bir daha göstərdi ki, Azərbaycan xarici siyasətdə artıq ənənəvi yanaşmalarla kifayətlənmir. Artıq prioritetlər dəyişib, konkret layihələr ön plana çıxır. Bu isə münasibətləri formal çərçivədən çıxarıb strateji məzmuna çevirir.Belə ki, 2017-ci ildə Azərbaycanla Latviya arasında strateji tərəfdaşlıq haqqında Bəyannamə də imzalanmışdlr. Coğrafi baxımdan Baltik regionu ilə Cənubi Qafqaz arasında məsafə böyükdür. Amma müasir dünyada məsafə artıq əsas meyar deyil. Əsas məsələ maraqların kəsişməsidir. Bununla yanaşı Latviya rəqəmsal idarəetmə, innovasiya və çevik dövlət mexanizmləri ilə Avropada seçilən ölkələrdəndir. Azərbaycan isə enerji təhlükəsizliyi, nəqliyyat dəhlizlərinin və regional sabitlik baxımından strateji əhəmiyyətə malik bir dövlətdir. Bu fərqlilik əslində ziddiyyət yox, tamamlayıcılıq yaradır. Beləliklə, Bakı və Riqa arasında formalaşan əlaqələr yüksək tərəfdaşlıq kimi qiymətləndirilir. Bu isə daha dayanıqlı və perspektivli model olmaqla yanaşı tarixdən gələn bir məntiqin yeni formada davamıdır.
Prezident cənab İlham Əliyevin çıxışlarında vurğulanan əsas xətt budur ki, əməkdaşlıq yalnız qarşılıqlı fayda gətirirsə davamlı olur. Bu isə dövlətlərarası münasibətləri emosional müstəvidən çıxarıb rasional müstəviyə keçirir. Latviya ilə münasibətlər də məhz bu prinsiplər üzərində qurulmuşdur.
Şuşada keçirilmiş Azərbaycan-Latviya Birgə Hökumətlərarası Komissiyanın iclasının keçirilməsi iqtisadi və humanitar əlaqələrimizin daha da dərinləşdirilməsinə təkan verən bir amildir.O cümlədən, təşkil olunan Biznes Forum isə iki dövlət arasında qarşılıqlı sərmayələrin qoyulmasına, birgə iqtisadi layihələrin reallaşmasına zəmin yaradacaq.
Latviya Prezidentinin bu səfərinin ən diqqətçəkən tərəflərindən biri də onun qısamüddətli nəticələrdən çox uzunmüddətli perspektivə hesablanmasıdır. Burada əsas məqsəd bugünkü vəziyyəti təsdiqləmək yox, sabahın konturlarını müəyyənləşdirməkdir. Bu baxımdan Azərbaycan aydın model təqdim edir: regional güc olmaqla yanaşı, qlobal sistemdə funksional rol oynamaq.
Latviya Prezidentinin səfəri bir daha göstərdi ki, yeni dünya düzənində uğur qazanan ölkələr yalnız gücə deyil, düzgün seçilmiş tərəfdaşlara arxalanır.
Kamilə Əliyeva
Bakı Dövlət Universitetinin kafedra müdiri, professor
