https://innews.az/uploads/news/2026-05/_innews_917190b4c763716365dd38eb7_o.jpg
Prezident cənab İlham Əliyevin Ermənistanın paytaxtı İrəvanda keçirilən "Avropa Siyasi Birliyi"nin 8-ci Zirvə görüşündə videobağlantı formatda çıxışı bir sıra avropalı siyasətçi və parlamentarilərə əsl siyasi və diplomatiya dərsi oldu. Artıq istər regional, istərsə də qlobal səviyyəli platformalarda ölkə başçımızla məsləhətləşmələr aparılır və hesablaşırlar. Məhz cənab İlham Əliyevin dəstəyi və razılığı sayəsində "Avropa Siyasi Birliyi"nin 8-ci Zirvə görüşünün Ermənistanda keçirilməsi barədə qərar qəbul edilmişdir. Hər zaman Azərbaycan dövlətinin maraqlarını hər şeydən uca tutan Prezidentimizin birliyin 2028-ci ildə Azərbaycanda keçirilməsi barədə təklifi də müsbət qarşılanmışdır. "Avropa Siyasi Birliyi"nin Zirvə görüşünün Ermənistanda keçirilməsinə dəstəyin verilməsi bir daha sübut edir ki, Azərbaycan dövləti regionda sülhün, stabilliyin, əmin-amanlığın bərpa olunması tərəfdarıdır. Ötən ilin avqustun 8-də Vaşinqtonda Ağ evdə Azərbaycanla Ermənistan arasında Birgə Bəyannamənin imzalanması ilə Cənubi Qafqaz regionunda sülhün yaranmasının təməli qoyuldu. İki dövlət arasında sülhün təməlinin qoyulması üçün məhz Azərbaycan dövləti birtərəfli qaydada Ermənistana tətbiq edilən bütün tranzit məhdudiyyətləri aradan qaldırdı. Orta Dəhlizin bir hissəsi olacaq "Trampın Beynəlxalq Sülh və Rifah Marşrutu" Naxçıvanı Azərbaycanın əsas hissəsi ilə birləşdirməklə yanaşı, Azərbaycan və Ermənistandan keçməklə Avropa ilə Asiyanı da birləşdirəcək ən optimal marşrut xətti olacaq.
Azərbaycanın həyata keçirdiyi bütün bu sülh təşəbbüsləri beynəlxalq səviyyədə, eləcə də Avropa Komissiyası tərəfindən də yüksək qiymətləndirilir və dəstəklənir. Təəssüf ki, bəzi qüvvələr regionda sülhün yaranmasına hər vəchlə mane olmağa çalışırlar. Prezident cənab İlham Əliyev çıxışında qətiyyətli və açıq şəkildə Avropa Parlamenti və AŞPA-nın sülh prosesinə mane olan siyasət həyata keçirdiyini vurğuladı. Ölkə başçımızın da qeyd etdiyi kimi bu gün AP və AŞPA öz mandatına uyğun işlərlə deyil, Azərbaycana qarşı böhtan və şantaj dolu qətnamələr qəbul etməklə məşğuldur. Azərbaycanın beynəlxalq hüquqa əsaslanaraq öz ərazi bütövlüyü və suverenliyini bərpa etməsi AP və AŞPA nı narahat edir. Bu qurumların kimin sifarişi ilə oynadığı da hər kəsə məlumdur. Sözsüz ki, AP və AŞPA-nın bu hərəkətləri cavabsız qalmadı. Azərbaycan Parlamenti AP ilə bütün sahələrdə əməkdaşlığı dayandırması və Avropa İttifaqı - Azərbaycan Parlament Əməkdaşlıq Komitəsinin işində iştirakına son qoyması, eləcə də Avronest Parlament Assambleyasında üzvlüyünün dayandırılmasına aid prosedura başlamaqla bağlı qərar qəbul etdi.
Prezident cənab İlham Əliyev çıxışında AP və AŞPA kimi qurumların riyakar sifətini açıq şəkildə göstərdi və Azərbaycanla Ermənistan arasında əbədi sülhün bərqərar olması üçün həyata keçirdiyi siyasətin mahiyyətini avropalı dövlət və hökumət başçılarının və beynəlxalq təşkilatların rəhbərlərinin diqqətinə çatdırdı.
Kamilə Əliyeva
Bakı Dövlət Universitetinin kafedra müdiri, professor
