https://innews.az/uploads/news/2026-05/_innews_ae3d6db91bd24a9483920a766_o.jpg
Azərbaycan xalqının Ümummilli Lideri Heydər Əliyevin anadan olmasının 103-cü ildönümü münasibətilə Daşkənd şəhərində konsert proqramı təşkil olunub.
Tədbir Azərbaycan Respublikasının Özbəkistan Respublikasındakı Səfirliyinin tabeliyində Heydər Əliyev adına Azərbaycan Mədəniyyət Mərkəzi tərəfindən həyata keçirilib.
Mərasimdə Azərbaycan Respublikasının Özbəkistandakı fövqəladə və səlahiyyətli səfiri Hüseyn Quliyev, habelə Rusiya Federasiyası və Tacikistan Respublikasının bu ölkədəki fövqəladə və səlahiyyətli səfirləri Aleksey Yerxov və Abducabbor Rahmonzoda, həmçinin dövlət xadimləri, Türk dünyasını təmsil edən şairlər, yazıçılar və incəsənət nümayəndələri, tələbələr, media təmsilçiləri və Daşkənddə yaşayan Azərbaycan diasporunun üzvləri iştirak ediblər.
Konsert proqramı Ulu Öndərin əziz xatirəsinin yad edilməsi, zəngin dövlətçilik irsinin və Azərbaycan xalqı qarşısındakı tarixi xidmətlərinin geniş ictimaiyyətə çatdırılması məqsədilə təşkil edilib.
Tədbirin rəsmi hissəsində Azərbaycanın Respublikasının Özbəkistan Respublikasındakı fövqəladə və səlahiyyətli səfiri Hüseyn Quliyev çıxış edərək Heydər Əliyevin müasir Azərbaycan dövlətinin qurulması və möhkəmləndirilməsi istiqamətində tarixi xidmətlərindən danışıb. Bildirilib ki, Ulu Öndərin uzaqgörən siyasəti Azərbaycanın müstəqilliyinin qorunmasına, ölkədə siyasi sabitliyin təmin olunmasına və dövlətçilik ənənələrinin güclənməsinə mühüm zəmin yaradıb.
Qeyd olunub ki, Heydər Əliyevin müəyyən etdiyi inkişaf strategiyası bu gün Prezident İlham Əliyev tərəfindən uğurla davam etdirilir və Azərbaycanın beynəlxalq mövqelərinin möhkəmlənməsinə xidmət edir.
Rəsmi hissədən sonra tədbir bədii proqramla davam edib. Konsert proqramında Özbəkistanın və Azərbaycanın Xalq artisti Fərrux Zakirov, həmçinin tanınmış azərbaycanlı gənc sənətçilər — müğənni və bəstəkar İsmayıl Zeynalov, eləcə də istedadlı pianoçu Müşfiq Quliyev çıxış ediblər.
Sənətçilər ifaları ilə Azərbaycan klassik musiqisinin zənginliyini, milli melodiyaların bədii-estetik imkanlarını və klassik irsin müasir səhnədə aktuallığını peşəkarlıqla nümayiş etdiriblər. Təqdim olunan musiqi nömrələri Ulu Öndər Heydər Əliyevin əziz xatirəsinə dərin ehtiramın, Azərbaycan dövlətçiliyinə və milli-mənəvi dəyərlərə sədaqətin bədii ifadəsi kimi yadda qalıb.
Qeyd edilib ki, Heydər Əliyevin anadan olmasının 103-cü ildönümünə həsr olunan konsert proqramı Azərbaycan və Özbəkistan arasında mədəni-humanitar əlaqələrin inkişafına, xalqlarımız arasında dostluq və qardaşlıq münasibətlərinin möhkəmlənməsinə mühüm töhfə verib.
Ən son xəbərləri səhifəmizdən də izləyin
