https://innews.az/uploads/news/2026-05/_innews_dfa6579c00891630f3f11cf8a_o.jpg
Aqrar Sığorta Fondu ölkəmizdə dövlət dəstəyi ilə təqdim olunan aqrar sığorta mexanizmi barədə əhalini və fermerləri məlumatlandırmaq üçün tədbirləri davam etdirir.
Mayın 21-də Biləsuvar rayonunda Aqrar Sığorta Fondu və Biləsuvar Rayon İcra Hakimiyyətinin təşkilatçılığı ilə «Dayanıqlı fermer fəaliyyəti üçün aqrar sığorta» mövzusunda tədbir keçirilib.
Tədbirdə Aqrar Sığorta Fondu, Biləsuvar Rayon İcra Hakimiyyəti, Biləsuvar Dövlət Aqrar İnkişaf Mərkəzinin nümayəndələri, fermerlər və təsərrüfat sahibləri iştirak edib.
Fermerləre kənd təsərrüfatındakı risklər, xüsusilə pambıq sahələrinə vurulan zərərlər, bu hallardan qorunmaq üçün aqrar sığorta mexanizmi barədə geniş məlumat verilib.
Biləsuvar İcra Hakimiyyətinin nümayəndəsi Təbriz Allahquluzadə rayonun kənd təsərrüfatı sahəsində vəziyyət, bu sahədə həyata keçirilən tədbirlər və kənd təsərrüfatı üçün risklər barədə məlumat verib. Onun sözlərinə görə, son dövrlər baş verən iqlim dəyişiklikləri və təbiət hadisələri, o cümlədən fırtına, qasırğa və sel-subasma halları əkin sahələrinə də təsirini göstərir. Bundan başqa, Biləsuvarda tez-tez baş verən əkin sahələrinə vəhşi heyvanların hücumu halları da təsərrüfatlara ziyan vurur.
Aqrar Sığorta Fondunun idarə heyəti sədrinin müşaviri İdayət Zeynalov öz çıxışında bildirib ki, Azərbaycan Prezidenti İlham Əliyevin fərmanı ilə 2019-cu ildə təsis edilən Aqrar Sığorta Fondu bitkiçilik, heyvandarlıq və balıqçılıq təsərrüfatlarını sığortalayır. İndiyədək Fond ölkənin bütün ərazisi üzrə 23 milyon manat sığorta ödənişi həyata keçirib. Bu məbləğin 19,5 milyon manatı bitkiçilik, 3,5 milyon manatı heyvandarlıq təsərrüfatlarına ödənilib.
Tədbirdə Aqrar Sığorta Fondunun sığortaladığı məhsullar və təminat verilən hadisələr, sığorta şərtləri və tarifləri üzrə geniş təqdimat keçirilib.
Bildirilib ki, hazırda aqrar sığorta vasitəsilə 41 növ bitkini sığortalamaq mümkündür. Sığorta haqqının yarısı dövlət tərəfindən ödənildiyinə görə, fermerlər cüzi məbləğ ödəyərək sığortalana bilərlər. Məsələn, Biləsuvarda 2400 manatlıq pambıq sahəsinin sığortalanması cəmi 14,64 manata, 1000 manatlıq buğda sahəsinin sığortalanması isə 7,4 manata başa gəlir.
Tədbirdə pambıq sahələrinin sığortalanması barədə ətraflı məlumat verildi. Bildirildi ki, hazırda Biləsuvar rayonunda 8 min hektardan artıq ərazidə becərilən pambıq çoxsaylı təbiət hadisələrinə həssasdır. Fırtına, qasırğa, sel-subasma, dolu, leysan yağışları, vəhşi heyvan hücumu, 3-cü şəxsin hərəkəti, yanğın və sair hallar pambıq sahələrinə böyük ziyan vura bilər. Nəticədə pambıq əkən fermerler nəinki gəlirini itirə, həmçinin böyük borc yükü ilə üzləşə bilərlər.
Aqrar Sığorta Fondu və Biləsuvar rayon icra hakimiyyətinin nümayəndələri belə hallarla üzləşməmək üçün fermerləri aqrar sığortadan faydalanmağa çağırıblar.
Tədbirdə Biləsuvar rayonunda həyata keçirilmiş sığorta ödənişləri də açıqlanıb. Bildirilib ki, indiyədək rayonda 132 min 103 manat məbləğində zərər ödənişi edilib. Bu ödənişlər arpa, buğda və pambıq sahələrinə dolu, fırtına, sel-subasma, 3-cü şəxslərin hərəkəti, vəhşi heyvan hücumu və yanğın hadisələri nəticəsində dəyən zərərlər üzrə həyata keçirilib. Aqrar Sığorta Fondu tərəfindən sığorta ödənişləri rayonun Amankənd, Bəydilli, Dərvişli, Əliabad, Xırmandalı, İsmətli, Nəsimi, Səmədabad, Təzəkənd kəndləri və Biləsuvar şəhərindəki əkin sahələri üzrə həyata keçirilib.
Fermer və təsərrüfat sahibləri aqrar sığortaya böyük maraq göstərib, onlar Aqrar Sığorta Fondunun nümayəndələrinə sığorta şərtləri, tarifləri və ödəniş qaydaları barədə çoxsaylı suallar ünvanlayıb, bütün suallar ətraflı cavablandırılıb.
Ətraflı məlumatı Aqrar Sığorta Fondunun rəsmi internet səhifəsindən (asf.gov.az), həmçinin 1651 Çağrı Mərkəzinə müraciət etməklə almaq mümkündür.
Ən son xəbərləri səhifəmizdən də izləyin
