Aqrar Xidmətlər Agentliyi tərəfindən Qurban bayramı ilə əlaqədar heyvan satışı və kəsimi yerlərində sağlamlaşdırıcı tədbirlər görülüb

Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzi Qurban bayramı günlərində fəaliyyətini gücləndirilmiş iş rejimində davam etdirir.

Bayram dövründə əhaliyə göstərilən baytarlıq xidmətlərinin operativ və təhlükəsiz təşkili, heyvan sağlamlığının qorunması, eləcə də baytarlıq-sanitariya tələblərinə əməl olunmasının təmin edilməsi məqsədilə Agentlik tərəfindən respublikanın bütün bölgələrində diri heyvan satış yerləri və kəsim məntəqələrinə baytar mütəxəssislər təhkim olunub.

Müvafiq qurumlarla koordinasiyalı şəkildə müəyyən edilmiş diri heyvan satış və kəsim məntəqələrində baytarlıq-sanitariya nəzarəti və heyvanların kliniki müayinələri həyata keçirilib. Baxış zamanı heyvanların sağlamlıq vəziyyəti yoxlanılıb, xəstəlik əlamətləri müşahidə olunduqda isə operativ baytarlıq yardımı göstərilib.

Eyni zamanda, diri heyvan satış yerlərində və kəsim məntəqələrində dezinfeksiya tədbirləri gücləndirilib. Kəsimdən əvvəl və sonra dezinfeksiya işləri həyata keçirilib. Bu məqsədlə rayon baytarlıq idarələrinin xüsusi dezinfeksiya vasitələri və texniki avadanlıqlar ərazilərə cəlb olunub.