https://innews.az/uploads/news/2026-06/_innews_204379d962188ac0e2266e454_o.jpg
İyunun 5-də Azərbaycan Milli Xalça Muzeyində sənətşünaslıq üzrə fəlsəfə doktoru, rəssam Elçin Şamillinin “Katarsis” adlı fərdi sərgisinin açılış mərasimi keçirilib.
Sərgi müəllifin uzun illər ərzində formalaşdırdığı fərdi bədii-fəlsəfi konsepsiyaya əsaslanır və müasir incəsənətdə tekstilin innovativ təqdimat formalarından biri kimi diqqət çəkir. Ekspozisiyada xalçanın kompozisiya quruluşuna əsaslanan, mücərrəd tekstil anlayışını, vizual dili və mədəni kodlar nəzəriyyəsini əks etdirən 20-dən çox əsər nümayiş olunur.
Sərginin əsas ideyası insanın görünən reallıqla yanaşı, şüuraltı və fövqəlşüur səviyyələrində yaşadığı daxili təcrübələrin araşdırılmasıdır. Burada abstraksiya yalnız estetik üsul deyil, həm də idrak modeli kimi təqdim olunur. Müəllif katarsisi insanın öz daxilində mövcud olan təhrif olunmuş qavrayışları və yalançı harmoniyaları üzə çıxarmaq prosesi kimi dəyərləndirir. Bu baxımdan katarsis yaddaşın strukturunu dəyişdirən, insanın “Mən – Dünya” münasibətlər sistemini yenidən qurmağa imkan verən transformasiya aktı kimi təqdim edilir.
Sərgidə xalça dəyişən həyat təcrübələri fonunda sabit düşüncə strukturlarının vizual modeli kimi çıxış edir.
“Katarsis” sərgisi müasir Azərbaycan incəsənətində tekstil sənətinin fəlsəfi və konseptual imkanlarını nümayiş etdirərək tamaşaçıları insan şüurunun dərin qatları, yaddaş, transformasiya və özünüdərk mövzuları üzərində düşünməyə çağırır.
Sərgi iyunun 7-dək davam edəcək.
Ən son xəbərləri səhifəmizdən də izləyin
