https://innews.az/uploads/news/2026-06/_innews_5d6d67e5dbce60b8fc4a0d720_o.jpg
Azərbaycan Auditorlar Palatasının sədri Vahid Novruzov İnsan Hüquqları Gününə həsr olunmuş “Dövlətin və təsərrüfat subyektlərinin mənafelərinin müdafiəsində auditin rolu” mövzusunda keçirilən konfransda çıxış edib.
“innews media” xəbər verir ki, V.Novruzov çıxışında auditin təkcə maliyyə nəzarəti mexanizmi olmadığını, həm də hüquqi dövlətin və iqtisadi şəffaflığın əsas dayaqlarından biri kimi çıxış etdiyini vurğulayıb.
Palata sədri bildirib ki, mülkiyyət, sahibkarlıq, sosial-iqtisadi hüquqların, investorların qanuni maraqlarının və vətəndaşların rifah hüququnun təmin olunması şəffaf maliyyə idarəetməsindən birbaşa asılıdır.
Onun sözlərinə görə, audit rəqəmlərin arxasında dayanan həqiqəti və iqtisadi qərarların etibarlılığını üzə çıxararaq müəssisələrlə investorlar arasında etimad körpüsü yaradır:
“Bu gün iqtisadi inkişafın əsas meyarlarından biri etimaddır. Etimad olmayan yerdə investisiya zəifləyir, iqtisadi fəallıq azalır və nəticədə sosial rifah zərər görür. Audit isə bu etimadı təmin edən mühüm institusional mexanizmdir”.
Vahid Novruzov qeyd edib ki, müasir audit artıq sadəcə məcburi yoxlama proseduru deyil, biznesin inkişafı və davamlılığı üçün qabaqlayıcı idarəetmə alətinə çevrilib. Onun fikrincə, şəffaf maliyyə hesabatlılığı müəssisələrin bazardakı nüfuzunu artırır, investisiya imkanlarını genişləndirir və tərəfdaşların etimadını gücləndirir.
Palata sədri rəqəmsallaşma və süni intellekt dövründə audit peşəsinin qarşısında yeni çağırışların yarandığını da diqqətə çatdırıb. O bildirib ki, kiberdələduzluq dünya iqtisadiyyatına qlobal ÜDM-in təxminən 10 faizi həcmində zərər vurur.
V.Novruzovun sözlərinə görə, aparılmış araşdırmalar müəssisələrdə kibertəhlükəsizlik problemlərinin 56 faizinin əməkdaşların səhlənkarlığı, 26 faizinin qəsdən törədilən əməllər, 18 faizinin isə uçot məlumatlarının oğurlanması ilə bağlı olduğunu göstərir.
“Bu gün auditor yalnız maliyyə hesabatlarını yoxlayan mütəxəssis deyil, həm də elektron sübutların etibarlılığını, məlumatların bütövlüyünü və kiberrisklərin maliyyə hesabatlarına təsirini qiymətləndirən peşəkardır”, – deyə o vurğulayıb.
Çıxışında Auditorlar Palatasının 2026-cı ili “Etika ili” elan etdiyini xatırladan Vahid Novruzov bildirib ki, bu təşəbbüs auditor peşəsində dürüstlük, obyektivlik, müstəqillik və ictimai etimada əsaslanan davranış prinsiplərinin daha da möhkəmləndirilməsinə xidmət edəcək.
Sonda Palata sədri auditin sahibkar üçün inkişaf aləti, dövlət üçün etibarlı informasiya mənbəyi, investor üçün güvən təminatı, cəmiyyət üçün isə şəffaflıq və hesabatlılıq mexanizmi olduğunu vurğulayaraq, Auditorlar Palatasının bu istiqamətdə fəaliyyətini qətiyyətlə davam etdirəcəyini bildirib.
Ən son xəbərləri səhifəmizdən də izləyin
