Akademik Musiqili Teatr Beynəlxalq Teatr Festivalında iştirak edib

İyunun 25-də Azərbaycan Dövlət Akademik Musiqili Teatrının "Utancaq qız" monotamaşası Əməkdar artist Şövqi Hüseynovun təqdimatında Moldovanın paytaxtı Kişineuda keçirilən XIV Moldfest Beynəlxalq Teatr Festivalında uğurla nümayiş olunub.

Yuri Harmelin adına "Qızılgüllər küçəsindəki" Dövlət Gənclər Dram Teatrının səhnəsində təqdim olunan tamaşada aktyorun yüksək peşəkarlıqla yaratdığı obraz festival iştirakçıları və teatr mütəxəssisləri tərəfindən böyük maraq və sürəkli alqışlarla qarşılanıb.

Əməkdar artist festivalın ölkələr arasında mədəni əməkdaşlığın möhkəmləndirilməsi və təcrübə mübadiləsi baxımından əhəmiyyətini vurğulayaraq təşkilatçılara təşəkkürünü bildirib.

O, həmçinin göstərilən səmimi qonaqpərvərliyə və diqqətə görə Azərbaycanın Moldovadakı fövqəladə və səlahiyyətli səfiri Ülvi Baxşəliyevə, Kişineuda fəaliyyət göstərən Azərbaycan diasporunun rəhbərliyinə, eləcə də diasporun fəal üzvləri Müharib Allahverdiyev və Əli Məmmədova minnətdarlığını ifadə edib.

Xatırladaq ki, "Utancaq qız" monotamaşası dünya ədəbiyyatının görkəmli nümayəndəsi Fyodor Dostoyevskinin eyniadlı fantastik povesti əsasında Xalq artisti Cənnət Səlimovanın quruluşunda hazırlanıb. Şövqi Hüseynov bu tamaşa ilə indiyədək bir sıra beynəlxalq teatr festivallarında uğurla çıxış edib və müxtəlif mükafatlara layiq görülüb.