https://innews.az/uploads/news/2026-07/_innews_217c56fba51334871eb1efe09_o.jpg
Avropa İttifaqının rəhbər şəxslərinin ölkəmizə ardıcıl səfərləri münasibətlərin müsbət dinamik inkişafından xəbər verir. Avropa İttifaqı Şurasının Prezidenti Antonio Koşdanın, Avropa diplomatiyasının rəhbəri Kaya Kallasın Azərbaycana səfərlərinin ardınca Avropa İttifaqı Komissiyasının Prezidenti Ursula Fon der Lyayenin gəlməsi Avropa İttifaqı ilə Azərbaycan arasında əlaqələrin yeni müstəviyə qədəm qoyması kimi qiymətləndirilir. Bu cür intensiv səfərlər tərəflər arasında etimadın möhkəmləndirilməsinə, qlobal və regional məsələlərdə sıx əməkdaşlıq əlaqələrinin qurulmasına böyük töhfə verir.
Prezident cənab İlham Əliyev və Ursula Fon der Lyayenin arasında keçirilən istər təkbətək, istərsə də geniştərkibli görüşlərdə bir çox siyasi və iqtisadi sahələri əhatə edən mövzular barədə fikir mübadiləsi aparıldı. Mətbuata bəyanatla çıxışı zamanı xanım Lyayenin Azərbaycanı "strateji tərəfdaş" ölkə adlandırması Avropa İttifaqının Azərbaycana olan münasibətinin real nümunəsidir. Avropa İttifaqı rəsmisi Azərbaycanın Avrasiya məkanında çox önəmli bir dövlət olduğunu və Prezident cənab İlham Əliyevin həyata keçirdiyi həm siyasi, həm də iqtisadi kursun Azərbaycanla yanaşı digər dövlətlərin də inkişafına töhfə verdiyini vurğuladı. Artıq dünya dövlətləri Azərbaycanın etibarlı tərəfdaş ölkə olduğunu vurğulayırlar. Ursula Fon der Lyayen Azərbaycanla Ermənistan arasında sülh prosesinin yaranmasında Azərbaycanın mövqeyinin Avropa İttifaqı tərəfindən dəstəkləndiyini və Prezident cənab İlham Əliyevin siyasi lider olduğunu xüsusi vurğuladı.
Mətbuata bəyanatla çıxışında Prezident cənab İlham Əliyev hal hazırda Avropa İttifaqı ilə Azərbaycan arasında iqtisadi əlaqələrin yüksək səviyyədə olduğunu xüsusi qeyd etdi. Bu gün Avropa İttifaqı Azərbaycanın əsas ticarət tərəfdaşıdır. Təsadüfi deyil ki, ölkəmizin ticarət dövriyyəsinin 40%-dən çoxu Avropa İttifaqına üzv dövlətlərin payına düşür, o cümlədən Avropa İttifaqının Cənubi Qafqazda ticarət dövriyyəsinin 70%-nin Azərbaycanla formalaşdırılması iqtisadi əlaqələrin yüksək səviyyəsinin göstəricisidir. Ölkə başçımızın vurğuladığı kimi müasir dünyada enerji təhlükəsizliyi dövlətlərin milli təhlükəsizliyinə bərabər tutulan bir amildir. Sözsüz ki, bu gün Azərbaycan Avropa dövlətlərinin enerji təhlükəsizliyində mühüm rol oynayır. Azərbaycandan ixrac olunan qazın yarısı Avropa İttifaqına üzv dövlətlərə nəql edilir ki, bu dövlətlərin sayı 10-a çatmışdır. Ölkəmizdə yeni yataqlardan çıxarılan qazın həcmi imkan verir ki, gələcəkdə bu dövlətlərin sayı artsın. Bu istiqamətdə Avropa İttifaqına üzv dövlətlərlə iş birliyi davam etdirilir və Azərbaycan dövləti tərəfindən boru xətlərinin modernləşdirilməsi üçün böyük maliyyə vəsaiti ayrılır. Bu işdə Avropa İttifaqı və bir sıra nəhəng maliyyə korporasiyaları Azərbaycana vəsait ayırmağı planlaşdırır. Azərbaycan dövləti coğrafi cəhətdən Şimal-Cənub, Şərq-Qərb marşrut xətlər üzərində yerləşir və Prezident cənab İlham Əliyevin ölkəmizdə reallaşdırdığı şaxələndirilmiş nəqliyyat-loqistika layihələri Avrasiya məkanının iqtisadi inkişafına böyük töhfə verir. İstər Şimaldan Cənuba, istərsə də Şərqdən Qərbə Azərbaycan üzərindən daşınan yüklərin həcmi hər il artmaqdadır. Məhz Azərbaycanda nəqliyyat-loqistika infrastrukturunun mövcudluğu sayəsində həm Avropa, həm də Asiya regionunda yerləşən ölkələr iqtisadi cəhətdən böyük mənfəət əldə edirlər. Sözsüz ki bu Azərbaycan iqtisadiyatına da böyük mənfəət gətirir. Yaşıl enerji istehsalı sahəsində də ölkəmiz Avropa İttifaqı ilə sıx əməkdaşlıq edir. Azərbaycanda bu sahəyə yatırılan investisiyalar və görülən böyük işlər sayəsində yaxın vaxtlarda Azərbaycan Avropaya yaşıl enerji də ixrac edəcək. Bu Avropanın enerji təhlükəsizliyinə əlavə dəstək olacaq. Avropa İttifaqı Komissiyasının Prezidentinin Azərbaycana səfəri Avropa İttifaqı ilə Azərbaycan arasında münasibətlərin yeni mərhələyə qədəm qoyacağına səbəb olacaq, istər siyasi, istərsə də iqtisadi sahələrdə əməkdaşlığın dərinləşdirilməsinə öz töhfəsini verəcək.
Kamilə Əliyeva
Bakı Dövlət Universitetinin kafedra müdiri, professor
Ən son xəbərləri səhifəmizdən də izləyin
