https://innews.az/uploads/news/2026-07/_innews_932372d01b3218a1772486e36_o.jpg
Cənab Prezident İlham Əliyevin Almaniyaya həyata keçirdiyi son rəsmi səfər siyasi, iqtisadi və strateji baxımdan xüsusi əhəmiyyət daşıyır. Bu səfər iki ölkə arasında münasibətlərin yeni mərhələyə qədəm qoyduğunu nümayiş etdirməklə yanaşı, Azərbaycanın beynəlxalq aləmdə artan nüfuzunun və etibarlı tərəfdaş kimi mövqeyinin daha da möhkəmləndiyini göstərir.
Bu gün Azərbaycan-Almaniya münasibətləri yüksələn xətt üzrə inkişaf edir və ölkəmiz bu əməkdaşlığın daha da genişləndirilməsinə xüsusi önəm verir. Görünən odur ki, Almaniya da Cənubi Qafqazın aparıcı dövləti olan Azərbaycanla münasibətlərin inkişafında maraqlıdır. Son illərdə qarşılıqlı siyasi dialoqun intensivləşməsi, yüksək səviyyəli görüşlərin keçirilməsi və müxtəlif sahələrdə əməkdaşlığın genişlənməsi bunun bariz göstəricisidir.
Hazırda Azərbaycan və Almaniya enerji, iqtisadiyyat, sənaye, ticarət, nəqliyyat, logistika, bərpa olunan enerji, elm, təhsil və mədəniyyət sahələrində uğurlu əməkdaşlıq həyata keçirirlər. Xüsusilə enerji təhlükəsizliyi sahəsində Azərbaycan Avropanın etibarlı tərəfdaşı kimi mühüm rol oynayır. Avropada enerji mənbələrinin şaxələndirilməsinə artan ehtiyac fonunda Azərbaycanın təbii qaz ehtiyatları və etibarlı ixrac infrastrukturu böyük əhəmiyyət kəsb edir. Almaniyanın da Azərbaycan qazına maraq göstərməsi və ölkəmizdən enerji resurslarının alınması istiqamətində atılan addımlar iki ölkə arasında strateji əməkdaşlığın daha da güclənəcəyindən xəbər verir.
Bununla yanaşı, yaşıl enerji sahəsində əməkdaşlıq da yeni imkanlar açır. Azərbaycanın bərpa olunan enerji potensialı, xüsusilə külək və günəş enerjisi layihələri Almaniyanın qabaqcıl texnologiyaları ilə birləşərək hər iki ölkə üçün faydalı əməkdaşlıq perspektivləri yaradır. Bu istiqamətdə həyata keçiriləcək birgə layihələr həm iqtisadi inkişafı sürətləndirəcək, həm də qlobal iqlim məqsədlərinə töhfə verəcək.
Tərəflər arasında imzalanan sənədlər və əldə olunan razılaşmalar münasibətlərimizin artıq strateji tərəfdaşlıq səviyyəsinə yüksəldiyini göstərir. Alman şirkətlərinin Azərbaycanda uğurla fəaliyyət göstərməsi, müxtəlif sənaye və xidmət sahələrinə sərmayə yatırması ölkəmizin əlverişli investisiya mühitinin göstəricisidir. Azərbaycan da öz növbəsində Almaniyanın qabaqcıl texnologiyalarından, innovativ təcrübəsindən və investisiya imkanlarından faydalanmaqda maraqlıdır. Bu əməkdaşlıq hər iki ölkənin iqtisadi inkişafına müsbət təsir göstərməklə yanaşı, yeni iş yerlərinin yaradılmasına və biznes əlaqələrinin genişlənməsinə də şərait yaradır.
Prezident İlham Əliyevin Almaniyada yüksək səviyyədə qarşılanması, keçirilən görüşlər və ona göstərilən hörmət və etimad Azərbaycanın beynəlxalq nüfuzunun növbəti göstəricisi kimi qiymətləndirilə bilər. Bu, eyni zamanda Almaniyanın Azərbaycanla münasibətlərə verdiyi önəmi və gələcək əməkdaşlıq perspektivlərinə olan inamını nümayiş etdirir.
Qeyd edilməlidir ki, zaman-zaman münasibətlərdə müəyyən fikir ayrılıqları və gərgin məqamlar yaşansa da, qarşılıqlı hörmətə, beynəlxalq hüququn prinsiplərinə və konstruktiv dialoqa əsaslanan münasibətlər bu məsələlərin aradan qaldırılmasına imkan verib. Bu gün hər iki tərəf əməkdaşlığın daha da dərinləşdirilməsi və yeni istiqamətlər üzrə inkişaf etdirilməsi üçün siyasi iradə nümayiş etdirir.
Hesab edirəm ki, Prezident İlham Əliyevin Almaniyaya səfəri təkcə ikitərəfli münasibətlər baxımından deyil, həm də Azərbaycanın Avropa ilə əməkdaşlığının genişlənməsi, enerji təhlükəsizliyinin təmin olunması, iqtisadi əlaqələrin möhkəmləndirilməsi və regional sabitliyin gücləndirilməsi baxımından mühüm əhəmiyyət daşıyır. Atılan bu addımlar gələcəkdə Azərbaycan-Almaniya əlaqələrinin daha da inkişaf etməsinə, strateji tərəfdaşlığın möhkəmlənməsinə və hər iki xalqın mənafeyinə xidmət edən yeni layihələrin həyata keçirilməsinə mühüm töhfə verəcək.
Milli Məclisin deputatı Ceyhun Məmmədov
Ən son xəbərləri səhifəmizdən də izləyin
