https://innews.az/uploads/news/2026-08/_innews_d1fc2a36a47244717ef034e0d_o.jpg
Bakıda qazax güləşi üzrə dünya çempionatı keçiriləcək. Yarışın ölkəmizdə təşkili Azərbaycan idmanının inkişafı baxımından mühüm əhəmiyyət daşıyır.
"innews media" xəbər verir ki, bunu Azərbaycan Milli İdman Növləri Assosiasiyasının (AMİNA) prezidenti Kazım Qurbanov yarışla bağlı keçirilən mətbuat konfransında deyib.
Onun sözlərinə görə, dünya çempionatında 24 ölkədən idmançıların iştirakı gözlənilir.
“Əlimizdən gələni edib, dünya çempionatını yüksək səviyyədə təşkil etmək istəyirik. Qazax güləşi bu turnir vasitəsilə ölkələr arasında dostluq əlaqələrinin genişlənməsinə də töhfə verəcək”, - Kazım Qurbanov bildirib.
AMİNA-nın vitse-prezidenti Samir Abdullayev də dünya çempionatının Bakıda keçirilməsinin əhəmiyyətini vurğulayıb. O, turnirə qatılan hər kəsin yarışdan zövq alacağına və tədbirin yüksək səviyyədə təşkil olunacağına ümid etdiyini bildirib.
Assosiasiyanın baş katibi Seymur Qurbanov isə daha əvvəl Bakıda qazax güləşi üzrə turnirin keçirildiyini xatırladıb. Həmin yarışda 20-yə yaxın ölkənin iştirak etdiyini deyib.
O, dünya çempionatının maskotlarının da artıq müəyyənləşdirildiyini bildirib. Yarışın maskotları “Aslan” və “Batır” olacaq.
Seymur Qurbanov Bakı şəhərinin 2026-cı il üçün idman paytaxtı seçilməsinin də turnirin ölkəmizdə keçirilməsinə xüsusi məna qatdığını qeyd edib.
Dünya çempionatı 22-23 avqust tarixlərində Bakı İdman Sarayında keçiriləcək. Yarışda 24 ölkədən 200-ə yaxın idmançının iştirakı nəzərdə tutulur.
Azərbaycan çempionatda 16 güləşçi ilə təmsil olunacaq. Komandada 8 kişi və 8 qadın idmançı yer alacaq.
Kişilər arasında Elşən Dünyamalıyev (55 kq), Eyvaz Baxşıyev (60 kq), Mirfəttah Seyidəliyev (65 kq), Elvin Bağırov (74 kq), Adil Adilzadə (90 kq), Tuncay Şamil (100 kq) və Məmməd Məmmədzadə (+100 kq) mübarizə aparacaq.
Qadınların yarışında isə Mələkxanım Məmmədova (48 kq), Aynur Əfəndiyeva (52 kq), Fidan Hüseynova (56 kq), Leyla Atayeva (60 kq), Məryəm Mehdiyeva (65 kq), Günel Həsənli (70 kq), Diana Şoranova (77 kq) və Nigar Süleymanova (+77 kq) Azərbaycanı təmsil edəcəklər.
Ən son xəbərləri səhifəmizdən də izləyin
