https://innews.az/uploads/news/2026-09/_innews_8d585c7812a63db652408c8fc_o.jpg
Sentyabrın 14-də Azərbaycan Dövlət Pedaqoji Universitetinin (ADPU) Elmi Şurasının yeni tədris ili üçün ilk iclası keçirilib. İclasda universitetin 2026-2027-ci tədris ilinə hazırlıq vəziyyəti, cari il üçün tələbə qəbulunun nəticələri, magistratura və doktorantura səviyyələri üzrə qəbul göstəriciləri, eləcə də cari məsələlər müzakirə olunub.
Pedaqoji Universitetin rektoru professor Cəfər Cəfərov yeni tədris ilinin universitetin qarşısında mühüm vəzifələr qoyduğunu diqqətə çatdırıb və gündəlikdə duran məsələlərin əhəmiyyətini qeyd edib. Sonra isə rektor filologiya üzrə fəlsəfə doktoru Yeganə İsfəndərovaya fəlsəfə doktoru proqramı üzrə diplom, fəlsəfə üzrə fəlsəfə doktoru Paşa Quluzadəyə dosent attestatı təqdim edib. Həmçinin Nəşriyyat şöbəsinin müdiri Hüseyn Hacıyev 70 illik yubileyi münasibətilə fəxri fərmanla təltif olunub.
ADPU-nun 2026-2027-ci tədris ilinə hazırlıq vəziyyəti barədə məruzə edən tədris işləri üzrə prorektor dosent Eldar Aslanov 2025-2026-cı tədris ilinin yay semestrinin nəticələri, tələbə yerdəyişmələri, məzunların məşğulluq göstəriciləri, əvvəlki qəbul kampaniyasının nəticələri və yeni tədris ilinə hazırlıq istiqamətində görülən işlər barədə məlumat verib. Bildirilib ki, yay semestri 384 tələbə ilə 54 fənn üzrə təşkil olunub. İmtahanlarda iştirak edən 362 tələbədən 287-si müvəffəq, 75-i isə qeyri-müvəffəq qiymət alıb.
Məruzədə, həmçinin məzunların sonrakı təhsil və əmək fəaliyyəti ilə bağlı göstəricilər diqqətə çatdırılıb. Qeyd olunub ki, 2026-cı ildə ADPU-nun bakalavriat səviyyəsini normativ təhsil müddətində 2278 nəfər başa vurub. Onlardan 1040 nəfəri Azərbaycanda magistraturaya qəbul olub, 78 nəfər xaricdə magistratura təhsili üçün müraciət edib. 1163 məzun əmək bazarına daxil olub, 901 nəfər MİQ imtahanında iştirak edib və onların 805-i, yəni 89% faizi keçid balını toplayaraq seçim etmək hüququ qazanıb.
Yeni tədris ilinə hazırlıqla bağlı görülən işlər barədə məlumat verən prorektor bildirib ki, birinci tədris ili tələbələri üçün məlumatlandırma görüşlərinin dərslərlə paralel olaraq ilk həftə ərzində keçirilməsi, həmçinin universitet rəhbərliyinin tələbələrlə onlayn görüşünün təşkili nəzərdə tutulur.
Eləcə də, qeyd olunub ki, ötən dövrdə magistratura səviyyəsində 40 ixtisaslaşma üzrə təhsil proqramları hazırlanaraq təsdiqə təqdim edilib.
Çıxışda eksperimental qrupların yaradılması, yeni ixtisasların açılması istiqamətində işlərin davam etdirilməsi, yeni magistratura ixtisaslaşmalarının yaradılması, ADPU-2030 strateji planının icrasına diqqətin artırılması, illik iş planlarının Strateji İnkişaf Planına uyğunlaşdırılması, professor-müəllim heyətinin müasir təhsil mühitinin tələblərinə uyğun bacarıqlarının inkişaf etdirilməsi, “Moodle” sistemindən istifadənin genişləndirilməsi, növbəti ilin qəbul planının cari qəbul nəticələrinin təhlili əsasında hazırlanması və yeni ixtisaslar üzrə kadr hazırlığı üçün işçi qrupların fəaliyyətinin gücləndirilməsi əsas istiqamətlər kimi vurğulanıb.
2026-2027-ci tədris ili üzrə tələbə qəbulu ilə bağlı geniş analitik təqdimatla çıxış edən İctimaiyyətlə əlaqələr və marketinq şöbəsinin müdiri Taleh Mirzəyevin təqdimatında ölkə üzrə qəbulun ümumi mənzərəsi, ADPU və filiallarının qəbul göstəriciləri, pedaqoji ixtisasların payı, qəbulun keyfiyyət göstəriciləri, magistratura və orta ixtisas təhsili üzrə nəticələr müqayisəli şəkildə təhlil olunub.
Bildirilib ki, cari qəbul dövründə ADPU-nun bütün ixtisaslar üzrə 2570 plan yeri ölkə üzrə ümumi planın 4,18 faizini, ADPU şəbəkəsinin 3605 plan yeri isə ölkə üzrə plan yerlərinin 5,86 faizini təşkil edib. Pedaqoji ixtisaslar üzrə isə ADPU şəbəkəsinin 3075 plan yeri ölkə üzrə 8580 pedaqoji plan yerinin 35,84 faizinə bərabər olub. Bakalavriat üzrə qəbul nəticələrinə əsasən ADPU şəbəkəsində 3605 plan yerindən 3491-i ilkin yerləşdirmə zamanı dolub. Şəbəkə üzrə yekun dolma səviyyəsi 96,98 faiz təşkil edib. Dövlət sifarişi əsasında qəbulun payı 62,1 faizə yüksəlib, həmçinin dövlət sifarişi üzrə keçid balı 500 və daha yüksək olan ixtisasların sayı 14-ə çatıb. ADPU və onun filiallarına 600 və daha yüksək bal toplayan ümumilikdə 8 abituriyent qəbul olunub, maksimum nəticə isə Ağcabədi filialında 649,4 bal təşkil edib.
Magistratura üzrə qəbul nəticələri ilə bağlı çıxış edən elm və innovasiyalar üzrə prorektor professor Asəf Zamanov bildirib ki, 2026-2027-ci tədris ili üzrə magistratura səviyyəsində 637 plan yeri müəyyənləşdirilib. İlkin qəbul mərhələsində 561 namizəd qəbul olunub. Çıxış zamanı magistratura qəbulu üzrə çoxillik dinamika da diqqətə çatdırılıb. Qeyd olunub ki, son illərdə magistratura üzrə plan yerlərinin sayı artaraq 2021/2022-ci tədris ilindəki 372-dən 2026/2027-ci tədris ilində 637-yə yüksəlib ki, bu da son 5 ildə ADPU-nun magistratura qəbul planında 71,24 faiz artım deməkdir.
Professor Asəf Zamanov yeni ixtisaslaşmalar üzrə qəbul göstəriciləri barədə söz açaraq bildirib ki, Azərbaycan dilinin xarici dil kimi tədrisi, Fəlsəfə tarixi və Əhalinin müxtəlif əhali qrupları ilə sosial iş üzrə plan yerləri tam dolub. Magistratura üzrə mövcud nəticələrin təhlili əsasında qarşıdakı dövrdə boş qalan yerlərin səbəblərinin araşdırılması və qəbul planlaşdırılmasının təkmilləşdirilməsi istiqamətində işlərin davam etdirilməsinin vacibliyi vurğulanıb.
Daha sonra çıxış edən strateji inkişaf məsələləri üzrə prorektor Könül Pirverdiyeva ADPU-nun 2026-2027-ci tədris ili üçün İş Planının ADPU-2030 Strateji İnkişaf Planına uyğun olaraq yeni formatda təsdiq edilməsi, rektorun müşaviri Ümid Mehdiyev isə Maliyyə Komisiyasının təklifləri barədə təqdimat ediblər.
Sonra Şura cari məsələlərin müzakirəsi ilə davam edib. Sonda təklif edilən məsələlər səsə qoyularaq qəbul edilib.
Ən son xəbərləri səhifəmizdən də izləyin
