https://innews.az/uploads/news/2026-09/_innews_d16bcc6408091645d2e566688_o.jpg
Azərbaycan Dövlət Pedaqoji Universitetində (ADPU) 15 Sentyabr – Bilik Günü və yeni tədris ilinin başlanması münasibətilə tədbir keçirilib. Tədbirdə ADPU-ya yeni qəbul olunan tələbələr, onların ailə üzvləri, universitet rəhbərliyi, professor-müəllim heyəti və digər qonaqlar iştirak ediblər.
Açılış nitqi ilə çıxış edən ADPU-nun rektoru professor Cəfər Cəfərov universitetə yeni qəbul olunan tələbələri təbrik edib və onlara uğurlar arzulayıb. Rektor bildirib ki, yeni tədris ilinin ilk günü universitet həyatı üçün xüsusi əhəmiyyət daşıyır. Xüsusilə, müəllim hazırlığı ilə məşğul olan universitet üçün bu günün məsuliyyəti daha böyükdür. Çıxışda ADPU-nun ölkənin pedaqoji kadr hazırlığında mühüm rolundan, cari qəbul nəticələrindən və yüksək balla universiteti seçən abituriyentlərin sayındakı müsbət dinamikadan bəhs olunub. Qeyd edilib ki, bu il ADPU şəbəkəsi üzrə ayrılmış 3605 plan yerinin 3491-i ilkin yerləşdirmədə tutulub və qəbul planının təxminən 97 faizi yerinə yetirilib. Dövlət sifarişi üzrə keçid balı 500 və daha yüksək olan 14 ixtisasın mövcudluğu, həmçinin yüksək balla universiteti seçən abituriyentlərin sayı müəllimlik peşəsinə marağın artdığını göstərən mühüm göstəricilər kimi diqqətə çatdırılıb. Rektor çıxışında “ADPU–2030” Strategiyasının əsas hədəflərindən, universitetin rəqəmsal, beynəlxalq və çevik ali təhsil müəssisəsinə çevrilməsi istiqamətində həyata keçirilən tədbirlərdən də danışıb. ADPU-nun “QS World University Rankings 2027”də 1201–1400 aralığında yer almasının universitetin beynəlxalq reytinq sistemində ilk dəfə təmsil olunması baxımından mühüm nəticə olduğu vurğulanıb. Tələbələrə müraciət edən rektor universitet illərinin yalnız mühazirə, seminar və imtahanlardan ibarət olmadığını bildirib, tələbələri araşdırmağa, müzakirələrdə fəal iştirak etməyə, təşəbbüs göstərməyə və müxtəlif layihələrə qoşulmağa çağırıb. ektor yeni tədris ilinin ADPU ailəsi üçün yeni uğurların başlanğıcı olacağına inamını ifadə edib və bütün tələbə və professor-müəllim heyətini təbrik edib.
Tədbirdə universitetə ən yüksək balla qəbul olunan Lera Səfiyeva və Beynəlxalq idman uğurlarına görə müsabiqədənkənar qaydada ADPU-ya qəbul olunan İmaməddin Xəlilov çıxış ediblər. Onlar ADPU tələbəsi olmaqdan məmnunluqlarını ifadə edib, universitetə qəbul və yeni tələbəlik həyatının ilk təəssüratlarını bölüşüblər. Gənclər tələbə yoldaşlarına uğurlar arzulayıb və qarşıdakı təhsil illərinin onlar üçün yaddaqalan olacağına inamını ifadə ediblər.
Həmçinin ADPU-nun Filologiya, Tarix və coğrafiya, Riyaziyyat, Kimya və biologiya, Fizika, Məktəbəqədər təhsil, İbtidai təhsil və İncəsənət və fiziki tərbiyə fakültələri, Magistratura və doktorantura şöbəsi, Quba, Ağcabədi, Şəki, Şamaxı, Cəlilabad filialları və Pedaqoji Kollecdə də ilk dərs gününə həsr edilmiş tədbirlər və infosessiya görüşləri təşkil edilib.
Ən son xəbərləri səhifəmizdən də izləyin
