https://innews.az/uploads/news/2026-10/_innews_86a7867e02930e0e9f927ea80_o.jpg
Sentyabrın 30-da Bülbülün Memorial Muzeyində Azərbaycan professional vokal sənətinin banisi, "SSRİ Xalq artisti", "Stalin mükafatı laureatı", professor, ictimai xadim Bülbülün vəfatının 65-ci ildönümünə həsr olunmuş “Sözdən nəğməyə: Bülbül” adlı poetik-musiqili tədbir təşkil olunub.
Tədbiri giriş sözü ilə Bülbülün Memorial Muzeyinin direktoru Fərqanə Cabbarova açaraq qonaqları və iştirakçıları salamlayıb.
Daha sonra sözü “Modern Poems” layihəsinin rəhbəri Lalə Həsənovaya verib. Lalə Həsənova çıxışında görüşün əhəmiyyətindən və əsas məqsədindən — poeziya və musiqi vasitəsilə Azərbaycan mədəniyyətinin görkəmli nümayəndəsinin xatirəsini yaşatmaq, həmçinin yeni nəsli onun yaradıcılıq irsi ilə tanış etməkdən bəhs edib.
Tədbirin aparıcısı “Gənc Şairlər” layihəsinin uşaq istiqamətinin iştirakçısı Aliyə Tağıyeva olub. O, tədbir zamanı Bülbülün həyat və yaradıcılıq yolunun əsas mərhələlərini: Şuşadakı uşaqlıq illərini, səhnə fəaliyyətinin başlanğıcını, Azərbaycan Dövlət Opera və Balet Teatrındakı fəaliyyətini, İtaliyadakı təhsilini, pedaqoji fəaliyyətini, eləcə də xalq musiqisinin öyrənilməsi və qorunması istiqamətində gördüyü mühüm işləri diqqətə çatdırıb.
Proqramda “Gənc Şairlər” və “Modern Poems” layihələrinin uşaq və böyüklərdən ibarət iştirakçılarının poetik və musiqili çıxışları xüsusi yer tutub. Tədbir çərçivəsində Bülbülə və onun yaşadığı dövrə həsr olunmuş əsərlər səsləndirilib.
Şeirləri Aliyə Tağıyeva, Əzizə Məmmədova, Cənnət Məmmədova, İbrahim Alimzadə, Fateh Məmmədov, Məryəm Babayeva, Tamila Akhmedova və Elanur Karadağ təqdim ediblər.
Proqramın musiqi hissəsində respublika və beynəlxalq müsabiqələr laureatı İradə Hasilova və pianoçu, respublika və beynəlxalq müsabiqələr laureatı, Üzeyir Hacıbəyli adına Bakı Musiqi Akademiyasının məzunu, həmçinin firtepiano müəllim və pedaqoq Ofeliya Dadaşova çıxış ediblər.
Tədbirin sonunda Bülbülün Memorial Muzeyinin direktoru Fərqanə Cabbarova bütün iştirakçılara Fəxri Fərman təqdim edib.
Qonaqlar üçün həmçinin muzeydə ekskursiya təşkil olunub. Ekskursiya zamanı onlar görkəmli sənətkarın həyat və yaradıcılığına həsr olunmuş ekspozisiya və materiallarla tanış olublar.
Xatırladaq ki, Bülbül 1961-ci il sentyabrın 26-da vəfat edib.
Ən son xəbərləri səhifəmizdən də izləyin
