https://innews.az/uploads/news/2026-10/_innews_26fba737ce2f4f1fd7a44a17e_o.jpg
Azərkosmosun nəzdində fəaliyyət göstərən KOSMİK Akademiya Türkiyənin Antalya şəhərində keçirilən Beynəlxalq Astronavtika Konqresi çərçivəsində Beynəlxalq Kosmik Təhsil Məşvərət Şurası (International Space Education Board – ISEB) və Beynəlxalq Asteonavtika Federasiyası (International Astronautical Federation – IAF) ilə əməkdaşlıqda “Təhsil işçiləri üçün peşəkar inkişaf seminarı” (Educators Professional Development Workshop) təşkil edib.
Kosmik təhsil və elm sahəsində çalışan 100 STEAM müəllimini bir araya gətirən seminar iştirakçılar üçün təcrübə mübadiləsi, beynəlxalq əməkdaşlığın genişləndirilməsi və yeni tədris yanaşmalarının müzakirəsi baxımından mühüm platforma olub.
Seminarın əsas məqsədi kosmik elm və texnologiyaların tədrisində innovativ yanaşmaların təşviq edilməsi, təhsil işçilərinin praktiki bacarıqlarının inkişafına dəstək göstərilməsi və gələcək nəsil üçün daha müasir kosmik təhsil imkanlarının formalaşdırılmasına töhfə vermək olub.
Tədbirin proqramı Kanada Kosmik Agentliyi, Beynəlxalq Astronavtika Federasiyası, İstanbul Texniki Universiteti və İslam Dünyası Təhsil, Elm və Mədəniyyət Təşkilatından (ICESCO) olan qlobal kosmik təhsil liderlərinin çıxışları, ekspert paneli, interaktiv müzakirələr və praktiki məşğələ sessiyalarından ibarət olub.
Proqramın əsas hissələrindən biri “Gələcəyin kosmik kadrlarının hazırlanması” (Building the Space Workforce of Tomorrow) mövzusunda ekspert panel müzakirəsi olub. Panel zamanı kosmik sənayenin gələcək kadr ehtiyacları və bu ehtiyacların qarşılanmasında təhsilin rolu ətrafında fikir mübadiləsi aparılıb.
Seminar çərçivəsində Yaponiya Aerokosmik Tədqiqatlar Agentliyinin (JAXA) Kosmik Təhsil Mərkəzinin direktoru Fumiaki Tanigaki tərəfindən “JAXA”nın dünya üzrə tələbələr üçün təqdim etdiyi kosmik təhsil proqramları barədə təqdimat keçirilib. Təqdimat iştirakçılara beynəlxalq səviyyədə həyata keçirilən kosmik təhsil təşəbbüsləri ilə tanış olmaq və qabaqcıl təcrübələri öyrənmək imkanı yaradıb.
Tədbirin praktiki hissəsində iştirakçılar “Kosmik rəsədxanaların və teleskopların inşası” (Space Observatories & Telescopes Construction) adlı peşəkar inkişaf vörkşopunda iştirak ediblər. Sessiya zamanı iştirakçılar kosmik rəsədxanaların və teleskopların quruluşu haqqında praktiki biliklər əldə edib, həmçinin onların 3D modellərini hazırlamaq imkanı qazanıblar.
Seminarın interaktiv elementlərindən biri isə iştirakçıların kosmik elm və təhsil sahəsində biliklərini sınadığı “Kahoot!” sessiyası olub.
Tədbirin sonunda iştirakçıların peşəkar inkişafının və seminarda iştirakının tanınması məqsədilə onlara sertifikatlar təqdim edilib.
KOSMİK Akademiyanın beynəlxalq tərəfdaşlarla əməkdaşlıq çərçivəsində keçirdiyi bu seminar kosmik təhsilin inkişafı, qabaqcıl beynəlxalq təcrübələrin bölüşdürülməsi və təhsil işçilərinin yeni bilik və bacarıqlarla təmin edilməsi istiqamətində mühüm təşəbbüslərdən biri olub.
Ən son xəbərləri səhifəmizdən də izləyin
