https://innews.az/uploads/news/2026-10/_innews_c2ccbaa0448a446f6ec9bfc37_o.jpg
Sentyabrın 22-də Azərbaycan Dövlət Pedaqoji Universitetində (ADPU) Azərbaycan Respublikası Elm və Təhsil Nazirliyi, Azərbaycan Dövlət Pedaqoji Universiteti, Qərbi Azərbaycan İcması, Azərbaycan Respublikasının Təhsil Şurası və ADPU-nun Qərbi Azərbaycan Araşdırmaları Mərkəzinin birgə təşkilatçılığı ilə akademik Hüseyn Əhmədovun anadan olmasının 100 illiyinə həsr olunmuş “Azərbaycan təhsil və pedaqoji fikir tarixi” Respublika elmi-praktik konfransının plenar iclası keçirilib.
Plenar iclasda elm və təhsil ictimaiyyətinin nümayəndələri, ali təhsil müəssisələrinin rəhbərləri, professor-müəllim heyəti, tədqiqatçılar və pedaqoji sahə üzrə mütəxəssislər iştirak ediblər.
Giriş sözü ilə çıxış edən Azərbaycan Dövlət Pedaqoji Universitetinin rektoru professor Cəfər Cəfərov akademik Hüseyn Əhmədovun Azərbaycan təhsilinin və pedaqoji elminin inkişafında mühüm xidmətlər göstərdiyini bildirib. Rektor qeyd edib ki, alimin elmi yaradıcılığı Azərbaycan təhsil tarixinin, pedaqoji fikir və maarifçilik ənənələrinin araşdırılması baxımından xüsusi əhəmiyyət daşıyır. Cəfər Cəfərov vurğulayıb ki, akademik Hüseyn Əhmədovun elmi irsinin öyrənilməsi yalnız keçmiş pedaqoji təcrübənin tədqiqi deyil, həm də müasir təhsil proseslərinin elmi əsaslarla dərk edilməsi baxımından əhəmiyyətlidir. Rektor Azərbaycan təhsil və pedaqoji fikir tarixinin araşdırılması istiqamətində fundamental tədqiqatların davam etdirilməsinin, bu zəngin irsin yeni nəsil tədqiqatçılara çatdırılmasının vacibliyini diqqətə çatdırıb.
Çıxış edən Azərbaycan Dövlət Neft və Sənaye Universitetinin rektoru dosent Rüfət Əzizov Azərbaycan ali təhsil sisteminin inkişafında elmi ənənələrin və pedaqoji irsin roluna toxunub. R.Əzizov akademik Hüseyn Əhmədovun elmi-pedaqoji fəaliyyətinin Azərbaycan təhsil tarixinin öyrənilməsi baxımından əhəmiyyətini qeyd edib, görkəmli alimlərin irsinin tədqiqinin müxtəlif elm sahələri arasında əlaqələrin gücləndirilməsinə və təhsil elminin inkişafına xidmət etdiyini bildirib.
Qərbi Azərbaycan İcması İdarə Heyətinin sədri, Milli Məclisin deputatı dosent Əziz Ələkbərli çıxışında Azərbaycan xalqının zəngin təhsil və maarifçilik ənənələrindən, milli pedaqoji fikrin formalaşmasında görkəmli ziyalıların rolundan danışıb. O, bu irsin araşdırılmasının tarixi yaddaşın qorunması və elmi dövriyyəyə gətirilməsi baxımından əhəmiyyətini vurğulayıb. Əziz Ələkbərli akademik Hüseyn Əhmədovun da bu istiqamətdə çoxillik elmi fəaliyyətinin mühüm yer tutduğunu qeyd edib.
Bakı Dövlət Universitetinin kafedra müdiri, AMEA-nın müxbir üzvü professor Misir Mərdanov Azərbaycan təhsil tarixinin müxtəlif mərhələlərinin araşdırılmasında elmi irsin əhəmiyyətinə toxunub. Professor akademik Hüseyn Əhmədovun təhsil tarixinin və pedaqoji fikrin sistemli şəkildə tədqiqinə verdiyi töhfələrdən bəhs edib, onun əsərlərinin bu sahənin elmi mənzərəsinin formalaşdırılmasında rolunu qeyd edib.
Rusiya Təhsil Akademiyasının həqiqi üzvü, professor, akademik-katib Stanislav Petroviç Lomov isə təhsil tarixinin öyrənilməsinin müasir pedaqoji elmin inkişafı üçün əhəmiyyətindən danışıb. O, akademik Hüseyn Əhmədovun elmi fəaliyyətinin Azərbaycan pedaqoji fikrinin tədqiqi ilə yanaşı, pedaqoji irsin gələcək nəsillərə ötürülməsi baxımından da diqqətəlayiq olduğunu bildirib.
ADPU-nun elm və innovasiyalar üzrə prorektoru professor Asəf Zamanov isə akademik Hüseyn Əhmədovun elmi fəaliyyətinin əsas istiqamətlərinə toxunub. Prorektor bildirib ki, akademikin araşdırmaları Azərbaycan pedaqoji elminin inkişaf tarixinin öyrənilməsi, ayrı-ayrı pedaqoji ideyaların və təhsil ənənələrinin sistemləşdirilməsi baxımından mühüm əhəmiyyət daşıyır. Asəf Zamanov elmi irsin yeni tədqiqatlarla zənginləşdirilməsinin zəruriliyini də diqqətə çatdırıb.
Azərbaycan Respublikası Elm və Təhsil Nazirliyi yanında İctimai Şuranın sədri, Bakı Dövlət Universitetinin professoru Hikmət Əlizadə Azərbaycan təhsil və pedaqoji fikir tarixinin araşdırılmasının elmi və ictimai əhəmiyyətindən bəhs edib. O, milli təhsil ənənələrinin öyrənilməsində fundamental elmi əsərlərin xüsusi rol oynadığını qeyd edərək, akademik Hüseyn Əhmədovun yaradıcılığının bu baxımdan tədqiqatçılar üçün əhəmiyyətli mənbə təşkil etdiyini vurğulayıb.
ADPU-nun İbtidai təhsilin pedaqogikası kafedrasının müdiri professor Fərrux Rüstəmov akademik Hüseyn Əhmədovun Azərbaycan pedaqogikasının tarixinin tədqiqində rolundan danışıb. Professor alimin pedaqoji fikir tarixinin müxtəlif istiqamətlərinin araşdırılmasına verdiyi töhfələri diqqətə çatdırıb, onun elmi irsinin pedaqoji tədqiqatların inkişafında əhəmiyyətli yer tutduğunu bildirib.
Çıxış edən Azərbaycan Respublikasının Təhsil İnstitutunun Elmi-pedaqoji kadrların hazırlanması şöbəsinin müdiri professor Hümeir Əhmədov elmi-pedaqoji kadr hazırlığı məsələlərinə toxunub. O, pedaqoji elmin inkişafında elmi məktəblərin formalaşmasının və mövcud elmi ənənələrin davam etdirilməsinin əhəmiyyətini vurğulayıb, akademik Hüseyn Əhmədovun irsinin gənc tədqiqatçılar üçün də mühüm elmi mənbə olduğunu qeyd edib.
Çıxışlarda akademik Hüseyn Əhmədovun Azərbaycan təhsil və pedaqoji fikir tarixinin öyrənilməsinə verdiyi töhfələr, onun çoxillik elmi-pedaqoji fəaliyyəti və zəngin elmi irsinin müasir tədqiqatlar baxımından əhəmiyyəti geniş müzakirə olunub.
Plenar iclasdan sonra konfrans işini bölmə iclasları ilə davam etdirib.
Ən son xəbərləri səhifəmizdən də izləyin
